Kastrati i reagon ashpër Nagavcit, ia përmend edhe 11 milionët për rrymën në Veri

Ai ia ka përmendur në reagim ndaj Nagavcit

Kryetari i Komunës së Kamenicës, Qëndron Kastrati, i është kundërpërgjigjur ministres së MASHTI-t, Arbërie Nagavcit, pasi kjo e fundit pas përplasjeve të banorëve të fshatit Shipashnicë me zyrtarët policorë kërkoi të mos përsëriten situate të tilla.

Kastrati, nëpërmjet një postimi në ‘Facebook’, ka thënë se ministrja Nagavci po e manipulon opinionin publik duke kundërshtuar reformat në arsim në Kamenicë. Lidhur me zotimin e VV’së për ndërprerjen e reformave në arsim, i pari i Komunës së Kamenicës ka thënë se ky premtim është bërë vetëm për “qëllime politike”.

“Kjo situatë është kryekput situatë politike e përdorur në tri palë zgjedhje, ku ju dhe veglat e Vetëvendosjes, nxitës të linçimeve në komunitet, keni përdorur situatën për të arritur qëllimet politike. U keni premtuar banorëve që kjo reformë nuk do të realizohet, do të rrëzohet sapo të vini ju në pushtet. Dhe ku është kompetenca juaj për të ndalë reformën?”, ka deklaruar ai.

Ai ia ka përmendur në reagim ndaj Nagavcit Qeverisë Kurti edhe 11 milionë eurot e dhëna për pagimin e rrymës elektrike në Mitrovicën Veriore.

“Një qeveri që është dorëzuar para Veriut të Mitrovicës duke ua paguar rrymën kripto-kriminelëve, sot e ka gjetë në një komunitet të vogël ta zhvillojë betejën e saj politike. Në këtë komunitet ku po ndodhë një reformë e mirëfilltë para të cilës ju vet jeni dorëzuar. Fatmirësisht jo të gjithë politikanët e shohin politikën si instrument për t’u fuqizuar për vete, por për të ndërmarrë veprime për të mirën e përbashkët dhe nuk zbrapsen nga sfida e parë që ua cenon zgjedhshmërinë”, ka shkruar tutje ai.

Postimi i plotë:

Znj. Nagavci ndale manipulimin!

Sot kur Komuna e Kamenicës po hapë një çerdhe shumë të nevojshme në një fshat të varfër për fëmijët 96% e të cilëve rrinë në shtëpi, Ministrja e Arsimit e cila zotim kryesor ka pasur hapjen e çerdheve, po e pengon atë.

Znj. ministre ndërpreje nxitjen e banorëve sepse me metodat e jashtëligjshme, nga kulla e të paprekshmes, porsi të ishte ministre e kohës së Ali Bungut po flet për mbyllje shkollash kur në fakt po hapet një çerdhe. Aq e informuar jeni. Aq kompetente jeni.

Nëse e zotëroni detyrën tuaj dhe po i përfillni siç pretendoni obligimet kushtetuese, ju ftoj t’i realizoni ato me mjete ligjore, jo t’i përforconi metodat e fisnore arkaike të funksionimit të shoqërisë të stilit “askush s’guxon të ju prekë”.

Kjo situatë është kryekput situatë politike e përdorur në tri palë zgjedhje, ku ju dhe veglat e Vetëvendosjes, nxitës të linçimeve në komunitet, keni përdorur situatën për të arritur qëllimet politike. U keni premtuar banorëve që kjo reformë nuk do të realizohet, do të rrëzohet sapo të vini ju në pushtet. Dhe ku është kompetenca juaj për të ndalë reformën? Përse vazhdoni ta luani dashamirësen kur e keni obligimin të deklaroheni për demarkimin e kompetencave? Përse nuk vetdijësoheni që kjo lojë juaja po dëmton fëmijët dhe prindërit e tyre të cilëve ua keni krijuar shpresat se ju mund t’i rregulloni problemet si me magji?

Ju shumë mirë e dini që për të kontribuar në trazimin e situatës nuk keni nevojë t’i merrni për dore banorët dhe t’i dërgoni në përballje me institucionet lokale, por mjafton të shkruani këso statuse dykuptimshe ku në nëntekst ftohet për rezistencë.

Tash e 20 vjet shkollimi u është dhënë fëmijëve. Edhe në Poliçkë e Sedllar. Por çfarë shkollimi është ai? Kjo është ajo që ju përfaqësoni! Kërkesën për të mirëmbajtur objekte ku fëmijët i shërbejnë sentimentit që një objekt po na sillka zhvillim, ndërkohë që s’ka përmbajtje. Ndërkohë që rezultatet e PISA-s e tregojnë të kundërtën. Ndërkohë që rradhët për të marrë vizën për në Gjermani janë pasqyrë e gjendjes sonë.

Një qeveri që është dorëzuar para Veriut të Mitrovicës duke ua paguar rrymën kripto-kriminelëve, sot e ka gjetë në një komunitet të vogël ta zhvillojë betejën e saj politike. Në këtë komunitet ku po ndodhë një reformë e mirëfilltë para të cilës ju vet jeni dorëzuar. Fatmirësisht jo të gjithë politikanët e shohin politikën si instrument për t’u fuqizuar për vete, por për të ndërmarrë veprime për të mirën e përbashkët dhe nuk zbrapsen nga sfida e parë që ua cenon zgjedhshmërinë.

Nëse e keni përnjëmend brengën, ju ftoj t’i ballafaqojmë arsyet, të dhënat, bindjet dhe bazën ligjore në një debat publik, e jo të fsheheni pas statuseve ku i shprehni dy-tri hamendësime dhe nxisni trazime në publik

Mundesia me shume...
Pamje me shume...
AlbaniaEnglishFrenchGermanItalyTurkey