Kovaçevski: Tani të nisin bisedimet për anëtarësim me BE-në

Kryeministri i Maqedonisë së Veriut, Dimitar Kovaçevski në intervistën e tij për gazetën greke “To Vima” tha se BE duhet që menjëherë të nis bisedimet me vendin e tyre, sepse në të kundërtën kjo do të rris euroskepticizmin dhe mosbesimin.

“Anulimi i vazhdueshëm i integrimeve evropian ndikon tek euroskepticizmi dhe mosbesimi në përgjithësi. Duhet t’i tejkalojmë kontestet rajonale. Sot është çështje sigurie dhe jo çështje ekonomike. Zgjerimi i BE-së rrit sigurinë dhe stabilizon demokracinë. Për Maqedoninë e Veriut dhe Shqipërinë është e rëndësishme që të nisin bisedimet me BE-në, pa anulime”, deklaroi kryeministri Kovaçevski.

Ai shtoi se për Maqedoninë e Veriut nuk ka alternativë tjetër përveç anëtarësimit në BE. “Për ne është një pranim i vlerave dhe angazhimeve më të larta demokratike perëndimore për të përmbushur standardet evropiane në shoqëri dhe institucione. Pengesa për fillimin e negociatave mes Shqipërisë dhe Maqedonisë së Veriut ndihet në të gjithë rajonin si një goditje për BE-në. Mungesa e miratimit të kornizës së negociatave është duke humbur kohë të vlefshme. Është e rëndësishme, veçanërisht në kontekstin e luftës në Ukrainë, që procesi të fillojë pa një ditë vonesë. Është e nevojshme që Maqedonia e Veriut të ketë një perspektivë të kristaltë evropiane, të ketë një proces integrues të parashikueshëm, të besueshëm, të fortë dhe të përshpejtuar”, deklaroi kryeministri Kovaçevski për “To Vima”. (INA)

LAJME TJERA
AlbaniaEnglishFrenchGermanItalyTurkey