Филипче: Партизацијата на институциите од страна на ВМРО-ДПМНЕ добива епидемиски размери

Во осврт на првите шест месеци од мандатот на Владата претседателот на СДСМ Венко Филипче истакна дека партизацијата на институциите добила епидемиски размери.

,, ВМРО-ДПМНЕ ја заробува државата и клучните институции во судството и безбедноста. АНБ е веќе партиска институција на ВМРО-ДПМНЕ со поставувањето на целосно нелегитимниот директор без никакви квалификации. Сите нови избрани судии откако е Мицкоски на власт се негов личен избор. Судии стануваат братучеди, партнери или сопружници на негови градоначалници. Во граѓанскиот совет на надзор на комуникациите се поставени луѓе кои имаат партиски книшки на ВМРО-ДПМНЕ во задниот џеб” порача Филипче.

Тој посочи дека ВМРО-ДПМНЕ посегнува по целосна партиска контрола на судството.

,,Јас уште по првите чекори на оваа Влада најавив дека ВМРО-МВРО се враќа. Но вчерашанта најава дека Владата планира да го распушти Судскиот совет, односно да разреши пет членови е чекор кон целосна контрола врз судството. Ова СДСМ нема да го дозволи, ова ќе значи газење на демократијата и враќање кон мрачните времиња на политички прогон. Овој потег на Владата е целосно спротивен на сите реформи и на она што Мицкоски го потпиша во планот за раст пред само неколку месеци во Брисел. Реформите со ова ќе бидат фрлени на буниште и на сила ќе стапи целосна контрола и партизација на судството. Ја алармирам целата македонска и меѓународна јавност дека ова не смее да се дозволи. СДСМ остро ќе се спротистави на ова и ќе направи се да не дојде до ова узрупирање на судската власт од страна на ВМРО-ДПМНЕ” посочи тој.

Филипче им се обрати и на граѓаните.

,,Сакам јасно да порачам до граѓаните, партизацијата на институциите од страна на ВМРО-ДПМНЕ е директен удар врз секој од вас. Сакам сите да размислат, што ќе направите ако полицијата, наместо да ве заштити, служи за да ги заштити нивните интереси? Што ќе биде кога секој кој не е подобен на оваа власт ќе биде осудуван како во времето на режимот? Каква иднина оставаме, ако секој мора да носи партиска книшка за да добие шанса во државата?
Тоа е режим и оваа влада чекори одлучно кон тоа” заклучи Филипче.