Buxheti i Maqedonisë për vitin 2027: 2 miliardë euro për pensione, 954 milionë për shëndetësi dhe 930 milionë për administratën

Propozim-buxheti për vitin 2027, në vlerë prej rreth 7,2 miliardë eurosh, ka hyrë në procedurë parlamentare, ndërsa tashmë kanë nisur debatet mes pushtetit dhe opozitës për mënyrën e shpenzimit të parave publike.

Sipas projektbuxhetit, rreth 2 miliardë euro janë paraparë për pensionet, 954 milionë euro për shëndetësinë dhe 930 milionë euro për pagat në sektorin publik.

Për investime kapitale janë ndarë vetëm 663 milionë euro, ndërsa deficiti buxhetor parashikohet të arrijë në 731 milionë euro, apo 3,5 për qind të BPV-së.

Për mbulimin e deficitit dhe shlyerjen e borxheve ekzistuese, shteti planifikon të marrë kredi në tregjet vendore dhe ndërkombëtare. Ndër detyrimet e vitit të ardhshëm është edhe kthimi i euroobligacionit prej 500 milionë eurosh, të emetuar në vitin 2023.

Ministrja e Financave, Gordana Dimitrieska-Koçoska, e cilëson buxhetin si të orientuar drejt stabilitetit ekonomik dhe investimeve zhvillimore, ndërsa opozita ka shprehur kritika për shpenzimet dhe nivelin e huamarrjes.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.