Iskra Haxhi Vasileva merr drejtimin e Prokurorisë për Krim të Organizuar dhe Korrupsion

Efikasiteti në ndjekjen penale dhe shfrytëzimi racional i burimeve do të jenë ndër prioritetet kryesore të drejtueses së re të Prokurorisë Themelore Publike për Ndjekjen e Krimit të Organizuar dhe Korrupsionit, Iskra Haxhi Vasileva.

Haxhi Vasileva sot dha deklaratën solemne para Këshillit të Prokurorëve Publikë për marrjen zyrtare të detyrës. Ajo tha se është e vetëdijshme për përgjegjësinë dhe sfidat me të cilat do të përballet në krye të këtij institucioni.

„Prioritetet janë të qarta: efikasiteti i ndjekjes penale, përshtatshmëria e punës sonë dhe shfrytëzimi i burimeve që na janë vënë në dispozicion. I njihni rrethanat dhe faktin se disa prej këtyre burimeve janë të kufizuara. Synimi është t’i përdorim ato në mënyrën më të mirë të mundshme, për të arritur rezultate më të suksesshme në ndjekjen penale“, deklaroi Haxhi Vasileva.

Ajo theksoi se do të angazhohet për ndjekje penale më efikase dhe të drejtpërdrejtë, veçanërisht në rastet që prekin interesin publik dhe qytetarët.

Haxhi Vasileva u zgjodh në krye të Prokurorisë për Krim të Organizuar dhe Korrupsion në zgjedhjet e mbajtura në fund të tetorit të këtij viti. Ajo fitoi 64 vota nga gjithsej 171 fletëvotime të vlefshme. Për këtë funksion kandiduan edhe prokurorët Faton Azizi, Trajçe Pelivanov, Lidija Raiçeviq dhe Jovan Cvetanovski.

Zgjedhja e drejtueses së re u bë pas përfundimit të mandatit të ish-kryeprokurorit Islam Abazi, i cili ishte zgjedhur në tetor të vitit 2022.

Lëndët që trashëgon nga paraardhësi

Ndër lëndët që mbeten nga mandati i Abazit dhe që do të trajtohen edhe gjatë drejtimit të Haxhi Vasilevës janë rastet „Mazuti“, „Soravia“ dhe „Bechtel dhe Enka“.

Haxhi Vasileva ka përvojë shumëvjeçare në prokurori, ndërsa që nga viti 2024 është pjesë e Prokurorisë për Krim të Organizuar dhe Korrupsion.

Ndër rastet e njohura për publikun në të cilat ajo ka vepruar janë lënda kundër gjyqtarit Gjoko Ristov, rastet „Zhan Mitrev“, „Oriental“, „Geriatria“ dhe procedura kundër Vase Anakievit. Flaka

Më herët, ajo ishte caktuar edhe për të vepruar në lëndë ku gazetarët, gjatë ushtrimit të detyrave të tyre profesionale, paraqiteshin si të dëmtuar, dëshmitarë ose persona të denoncuar.

The post Iskra Haxhi Vasileva merr drejtimin e Prokurorisë për Krim të Organizuar dhe Korrupsion appeared first on Flaka, në çdo lajm... .

Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.