Në Maqedoninë e Veriut mbi 141 mijë persona me diabet, mbi 6.600 raste të reja gjatë vitit 2025

Në Maqedoninë e Veriut janë regjistruar gjithsej 141.891 persona me diabet, ndërsa vetëm gjatë vitit 2025 janë evidentuar 6.614 raste të reja. Këto janë të dhënat e Regjistrit Kombëtar të Institutit të Shëndetit Publik, të publikuara me rastin e 14 Nëntorit – Ditës Botërore të Diabetit.

Këtë vit, Dita Botërore e Diabetit shënohet me moton “Veprim i hershëm kundër diabetit”, duke vënë theksin te rëndësia e diagnostikimit dhe parandalimit në kohë të kësaj sëmundjeje.

Sipas të dhënave zyrtare, nga numri i përgjithshëm i personave të regjistruar me diabet, 78.663 janë gra dhe 63.228 janë burra.

Forma më e përhapur është diabeti i tipit 2, me 134.918 pacientë të regjistruar, që përbëjnë 95,09 për qind të të gjitha rasteve.

Organizata Botërore e Shëndetësisë paralajmëron se më shumë se 40 për qind e personave me diabet në nivel global nuk janë të vetëdijshëm se vuajnë nga kjo sëmundje.

Shqetësues është fakti se diabeti i tipit 2 mund të zhvillohet gradualisht dhe pa simptoma të theksuara. Ndër shenjat më të shpeshta paralajmëruese janë etja e shtuar, urinimi i shpeshtë, lodhja e vazhdueshme, shikimi i turbullt dhe humbja e pavullnetshme e peshës trupore.

Nëse nuk zbulohet dhe kontrollohet me kohë, diabeti mund të shkaktojë komplikime serioze shëndetësore, përfshirë dëmtimin e veshkave, shikimit, nervave dhe enëve të gjakut, si dhe rritjen e rrezikut për sulm në zemër dhe goditje në tru.

Instituti i Shëndetit Publik rekomandon kontrolle të rregullta parandaluese, veçanërisht për personat mbi 45 vjeç dhe ata që kanë faktorë të shtuar rreziku.

Ushqimi i shëndetshëm, aktiviteti fizik, mbajtja e peshës së përshtatshme trupore dhe shmangia e duhanit mund të ndihmojnë ndjeshëm në parandalimin ose shtyrjen e shfaqjes së diabetit të tipit 2.

Diagnostikimi i hershëm, terapia adekuate dhe kontrollet e rregullta mbeten faktorë kyç për parandalimin e komplikimeve dhe përmirësimin e cilësisë së jetës së pacientëve. Flaka

The post Në Maqedoninë e Veriut mbi 141 mijë persona me diabet, mbi 6.600 raste të reja gjatë vitit 2025 appeared first on Flaka, në çdo lajm... .

Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.