Teleferiku i “Vodnos” Shkup, pritet të rikthehet në funksion nga mesi i dhjetorit

Teleferiku i Vodnos në Shkup pritet të nisë sërish punën nga mesi i dhjetorit, nëse përfundojnë me kohë punimet e rikonstruksionit dhe kontrollet e nevojshme të sigurisë.

Kryetari i Shkupit, Orce Gjorgjievski, bëri të ditur se aktualisht po zhvillohet rikonstruksioni i plotë i teleferikut, përfshirë rinovimin e kabinave dhe zëvendësimin e motorit.

Sipas tij, gjatë inspektimit janë konstatuar mangësi serioze, të cilat ia atribuoi mungesës së serviseve të mëdha dhe mirëmbajtjes së rregullt nga udhëheqësit e mëparshëm.

Për shkak të gjendjes së konstatuar, teleferiku ishte nxjerrë jashtë funksionit për të garantuar sigurinë e udhëtarëve.

„Për mua, siguria e qytetarëve është mbi gjithçka. Këtu nuk ka kompromis!”, deklaroi Gjorgjievski.

Ai theksoi se pas përfundimit të punimeve dhe kontrolleve teknike e të sigurisë, teleferiku do të jetë sërish në dispozicion të shkupjanëve dhe vizitorëve të qytetit.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.