Три празни автобуси експлодираа во Израел: „Ова требаше да биде стратешки терористички напад“

Израелската полиција истражува повеќе експлозии во кои учествувале три автобуси во Бат Јам, град јужно од Тел Авив, во, како што се сомнева, координиран терористички напад.

Инцидентот се случил синоќа, а пријавени се експлозии на различни паркинзи низ градот.

Окружниот полициски командант во Тел Авив одржа прес-конференција, на која изјави дека 5-те експлозиви пронајдени во автобусите низ градот, од кои 3 биле активирани, се верува дека потекнуваат од Западниот Брег, во кои имало експлозив со тајмер, како и белешки на хебрејски и арапски.

Според локалните медиуми, една од неексплодираните направи, тешка 5 килограми, носела порака „Одмазда од Тулкарем“, што се однесува на неодамнешната антитерористичка операција на израелската армија на Западниот Брег.

Говорејќи за локалниот телевизиски канал Канал 12, командантот на израелската полиција рече дека користените бомби биле темпирани и се нестандардни експлозиви.

Тие известија и дека експлозиите требало да се случат утрово кога автобусите биле полни со патници.

„Ова требаше да биде стратешки терористички напад“, објави Канал 12.

Како одговор на инцидентите во Бат Јам, министерот за одбрана Израел Кац рече дека и дал инструкции на војската „да го зголеми интензитетот“ на активностите во бегалските кампови на Западниот Брег.

На местото на настанот се распоредени силни полициски сили, а во тек е потрагата по осомничените, јавуваат израелските медиуми.

Единиците за деминирање го пребаруваат теренот за дополнителни сомнителни предмети.

Во истрагата е вклучена агенцијата за безбедност Шин Бет. Израелскиот премиер Бенјамин Нетанјаху добива ажурирања за ситуацијата, се вели во соопштението на неговиот кабинет.

На возачите на автобуси низ Израел им беше наредено да ги запрат своите линии и да ги прегледаат возилата за сомнителни предмети.

Сообраќајот на возовите во Бат Јам исто така беше привремено прекинат. Луѓето синоќа беа повикани да ги избегнуваат погодените области и да бидат внимателни.

Градоначалничката на Бат Јам, Цвика Брот ги увери жителите дека властите работат на исклучување на какви било понатамошни закани./Извор:Makfax