Зеленски: Бројот на загинати и ранети севернокорејски војници надмина 3.000

Украинскиот претседател Володимир Зеленски соопшти дека бројот на загинати и ранети севернокорејски војници во областа Курск надминува 3.000 луѓе.

„Постојат ризици од испраќање дополнителни војници и воена опрема за руската армија од Северна Кореја и ние ќе реагираме на тоа. Според прелиминарните податоци, бројот на загинати и ранети севернокорејски војници во Курск надминува 3.000 луѓе“, рече Зеленски на состанок на персоналот, повикувајќи се на извештајот на врховниот командант на вооружените сили на Украина, Олександр Сирски.

Според него, важно е светот да разбере дека ризикот од дестабилизација околу Корејскиот полуостров и во соседните региони се зголемува пропорционално со растот на соработката меѓу Москва и Пјонгјанг, пренесува Укринформ.

„Пренесувањето на искуството од модерното војување и ширењето на воената технологија од Русија е глобална закана. За светот цената за враќање на стабилноста е секогаш многу повисока од цената на ефективен притисок врз оние кои ја дестабилизираат ситуацијата и го уништуваат животот “, рече Зеленски.

Американското Министерство за одбрана на 26 ноември потврди дека најмалку 12.000 војници од Северна Кореја се распоредени во Русија за да ја поддржат војната на Кремљ против Украина.

Русија почна да ги користи севернокорејските војници во офанзивните операции во областа Курск, особено како дел од комбинираните единици на маринци и воздушни сили на Вооружените сили на Русија, наведува украинската агенција.

Британското Министерство за одбрана на почетокот на декември соопшти дека севернокорејската армија претрпела значителни загуби во борбите во областа Курск, каде што е во тек операцијата на одбранбените сили на Украина./Извор:Makfax