Убиството во Виена наводно е поврзано со неодамнешното апсење на државјани на Босна и Херцеговина и Србија

Во стан во виенскиот Отакринг е пронајдено осакатено тело, а оттогаш за позадината на ова брутално убиство се пишува во Австрија.

Австриски „oe.24.at“ објави теорија. Овој медиум пренесува дека постои можност убиството да е поврзано со неодамнешното апсење на нарко-клан составен од државјани на БиХ и Србија, кои тргувале со дрога вредна три милиони евра.

Станува збор за апсење на почетокот на јануари 2024 година, кога инспекторите од Државната криминалистичка полиција на Долна Австрија пронајдоа две плантажи за одгледување канабис во Генсерндорф и Баден и идентификуваа 12 лица осомничени дека го организирале одгледувањето и препродажбата.

Најпрвин седуммина од нив беа уапсени, шест во Корнејбург, а уште еден на друга локација. Тие се обвинети за производство и дистрибуција на околу 300 килограми сушен канабис, чија улична вредност е околу три милиони евра.

Според полициското соопштение, оваа криминална група изнајмила дури две згради во областа Генсерндорф и еден имот во Котингбрун, а таму одгледувале канабис од 2018 година. Седуммината уапсени се на возраст од 28 до 48 години, а истрагата е во тек против уште пет нивни соучесници. Според медиумите, тие имале стан во Цимеринг, 11-та област во Виена, каде криеле дрога.

Се враќаме кај телото пронајдено во станот во виенскиот Отакринг. Станот наводно бил бункер за складирање на дрога. Полицијата дошла до ова откритие следејќи ги наводите и откако добила налог за претрес на станот, наишла на неверојатно брутална сцена.

Телото било пронајдено во туш кабината, а во соседната просторија била плантажа за одгледување стебла канабис. До туш кабината е пронајдено столче во кое најверојатно бил мачен убиениот. Според медиумите, лешот бил осакатен бидејќи на убиениот му биле отсечени прстите.

– Ова јасно укажува на егзекуција со потпис на балканската мафија – изјавил еден од истражителите, пренесува „ое.24.ат“.