Kurti nga Elysée: I kërkova Macronit mbështetje për statusin e kandidatit

Kryeministri i Kosovës, Albin Kurti, i ka kërkuar presidentit të Francës, Emmanuel Macron, mbështetje që Kosova të marrë statusin e vendit kandidat dhe të hapë negociatat për anëtarësim në Bashkimin Evropian.

Kurti u prit të mërkurën, më 11 nëntor, në Pallatin Élysée. Një ditë më parë ai kishte marrë pjesë në darkën që Macron shtroi për pjesëmarrësit e Forumit të Paqes në Paris.

Pas takimit, Kurti shkroi në Facebook se Franca ka qenë aleate e fuqishme e Kosovës që nga lufta për çlirim dhe pavarësi. Ai tha se me Macronin biseduan për mundësi të reja bashkëpunimi, për integrimin euroatlantik të Kosovës dhe për sigurinë në rajon. Sipas tij, në takim u theksua rëndësia e mbështetjes së Francës për statusin e kandidatit dhe për hapjen e negociatave me BE-në.

Kurti shprehu edhe vlerësimin e tij për nismën e Macronit për mbrojtjen e fëmijëve nga rreziqet e përdorimit të teknologjisë. Kosova i është bashkuar Deklaratës Politike të Samitit të Fëmijëve, të lansuar në kuadër të Forumit.

Takimi vjen një javë pasi Komisioni Evropian publikoi raportin vjetor për Kosovën. Raporti vlerësoi se vendi ka bërë progres të kufizuar në fushat kryesore, për shkak të ngërçit politik dhe mangësive në sundimin e ligjit. Ndryshe nga Mali i Zi dhe Shqipëria, Kosova ende nuk ka një udhërrëfyes konkret për fazat e mëtejshme të integrimit.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.