Трамп се согласи да изгради огромен центар за вештачка интелигенција во Обединетите Арапски Емирати

САД и Обединетите Арапски Емирати објавија партнерство за изградба на гигантски комплекс на центри за податоци во Абу Даби, со цел развој на напредни можности за вештачка интелигенција, беше објавено за време на посетата на американскиот претседател Доналд Трамп на ОАЕ.

Според Министерството за трговија на САД, ова е најголемото распоредување на центар за податоци надвор од САД, а во првата фаза ќе вклучува центар за вештачка интелигенција од 1 гигават, додека крајната цел е комплекс од 5 гигавати, доволен за напојување на цел голем град. Проектот треба да опфати повеќе од 25 квадратни километри.

Проектот треба да го прошири присуството на американските компании за вештачка интелигенција и облак на Блискиот Исток, овозможувајќи подобра услуга за таканаречените земји од глобалниот југ. Министерството за трговија не именуваше никакви конкретни компании, но шефот на „Нвидија“, Јенсен Хуанг, беше виден на еден од состаноците на Трамп во ОАЕ. „Нвидија“ не коментираше.

ОАЕ со години инвестираат во идни технологии и имаат за цел да станат светски лидер во областа на вештачката интелигенција до 2031 година. Министерката за образование Сара Ал Амири пред доаѓањето на Трамп изјави дека земјата сака да ја диверзифицира економијата и да се фокусира на вештачката интелигенција и напредните технологии за да ја подготви економијата за ерата по нафтата.

Инвестициите во инфраструктура за вештачка интелигенција се сметаат за клучни за идната економска одржливост и регионалната конкурентност на ОАЕ.

Белата куќа, исто така, објави дека е постигнат договор со ОАЕ според кој Емиратите ќе градат или финансираат центри за податоци во САД кои ќе бидат „барем толку големи и моќни“ како оние планирани на Блискиот Исток./Извор:Makfax