11 komuna ende s’e kanë shlyer detyrimin ligjor financiar

Gati dhjetë muaj pas zgjedhjeve lokale, anëtarët e komisioneve zgjedhore në Mogillë ende presin të marrin kompensimet për angazhimin e tyre. Nga Komisioni Shtetëror i Zgjedhjeve thonë se, përveç Mogillës, edhe katër komuna të tjera – Kriva Pallanka, Çeshinovo-Obleshevë, Strumicë dhe Valandovë – nuk i kanë paguar fare kompensimet, ndërsa në gjashtë komuna pagesa është kryer vetëm pjesërisht.

“Përveç vërejtjeve ndaj komunave, që janë bërë disa herë, si vitin e kaluar me qëllim që të parashikohen me kohë mjetet për këtë qëllim në buxhetet komunale, ashtu edhe këtë vit me disa shkresa, KSHZ-ja nuk ka kompetencë tjetër, as mekanizëm për të vepruar sipas detyrimeve ligjore për pagesën e kompensimeve të organeve zgjedhore për Zgjedhjet Lokale 2025”, thonë nga KSHZ.

Nga KSHZ thonë se anëtarët e organeve zgjedhore duhet t’i kërkojnë të drejtat e tyre pranë komunave kompetente, sepse pagesa e kompensimeve është detyrim ligjor i tyre. Për shkak të rasteve të tilla, ata kanë propozuar tashmë ndryshime në Kodin Zgjedhor.

“Propozojmë që KSHZ të marrë plotësisht përsipër pagesën e kompensimeve për të gjitha organet zgjedhore, për të gjitha llojet e zgjedhjeve dhe referendum. Në rastin e fundit pamë se mënyra aktuale e kompetencave të ndara midis KSHZ-së dhe komunave krijon vonesa të panevojshme,” thonë nga KSHZ.

Përndryshe, në maj të këtij viti KSHZ siguroi pagesën e kompensimeve për 11 komuna me llogari të bllokuara. Komunat ku pagesat ende vonohen nuk janë midis tyre.

Zgjedhjet lokale u mbajtën më 19 tetor, ndërsa raundi i dytë më 2 nëntor të vitit të kaluar. Nga Komuna e Mogillës nuk u përgjigjën pse prej 10 muajsh nuk janë paguar paratë për njerëzit që zhvilluan votimin në zgjedhjet e vitit të kaluar.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.