31 vjet pa varrin e Remzi Hoxhës, i biri me thirrje të fortë: Na tregoni ku janë eshtrat e babait tim!

Ardian Hoxha u ka bërë thirrje Qeverisë së Shqipërisë, Prokurorisë dhe SPAK-ut që të ndërmarrin hapa konkretë për zbardhjen e plotë të fatit të babait të tij, i cili u rrëmbye më 21 tetor 1995 në Tiranë. Familja kërkon gjetjen e eshtrave të tij, 31 vjet pas zhdukjes.

Sot shënohen 31 vjet nga rrëmbimi dhe zhdukja e biznesmenit dhe veprimtarit shqiptar Remzi Hoxha, rasti i të cilit vazhdon të mbetet një nga çështjet më të rënda të pazbardhura plotësisht në Shqipëri.

Në këtë përvjetor, djali i tij, Ardian Hoxha, ka publikuar një deklaratë në emër të familjes, duke kërkuar nga institucionet shqiptare që të bëjnë gjithçka për gjetjen e eshtrave të babait të tij.

Sipas deklaratës, Remzi Hoxha u rrëmbye më 21 tetor 1995 nga vendi i tij i punës në Tiranë, nga persona që familja i lidh me ish-Shërbimin Informativ Kombëtar (SHIK).

Ardian Hoxha akuzon ish-presidentin shqiptar Sali Berisha për përgjegjësi lidhur me ngjarjen, ndërsa kritikon edhe kryeministrin Edi Rama, duke pretenduar se gjatë viteve të qeverisjes së tij nuk janë ndërmarrë hapa të mjaftueshëm për gjetjen e eshtrave.

“Vetëm një gjë nuk na e thotë prej 31 vitesh: ku e kanë lënë”, thuhet në deklaratën e tij, duke iu referuar fatit të babait.

Hoxha u ka bërë thirrje Qeverisë së Shqipërisë, Kryeministrisë, Prokurorisë dhe SPAK-ut që të hapin arkivat e ish-SHIK-ut, të rifillojnë kërkimet për eshtrat e të atit dhe të marrin në pyetje personat që mund të kenë informacione për ngjarjen.

Ai u është drejtuar gjithashtu personave që mund të dinë se ku ndodhen eshtrat, duke u kërkuar të flasin, edhe nëse dëshirojnë të ruajnë anonimitetin.

“Nuk kërkojmë hakmarrje, kërkojmë vetëm eshtrat”

Në deklaratën e tij, Ardian Hoxha thekson se familja nuk kërkon hakmarrje, por vetëm të drejtën për ta varrosur babanë e tyre me dinjitet.

“Neve nuk na intereson politika e Shqipërisë, as e majta, as e djathta. Nuk kërkojmë as dënimin e askujt dhe as hak për gjakun e babait tim. Kërkojmë vetëm eshtrat e tij, që t’ia bëjmë një varr dhe të vazhdojmë jetën tonë”, shprehet ai.

Në fund të mesazhit, Hoxha falënderon të gjithë ata që e kanë mbështetur familjen gjatë këtyre tri dekadave dhe shpreh dhimbjen për faktin se, edhe pas 31 vjetësh, vendndodhja e eshtrave të babait të tij nuk është zbardhur.

“Dua të jemi më në fund djemtë dhe vajzat e një njeriu të varrosur”, përfundon deklarata e Ardian Hoxhës.

Rasti i Remzi Hoxhës

Remzi Hoxha ishte biznesmen dhe veprimtar shqiptar me origjinë nga Maqedonia e atëhershme. Ai u rrëmbye në Tiranë më 21 tetor 1995 dhe familja e tij ka kërkuar për dekada zbardhjen e plotë të fatit të tij.

Çështja është trajtuar nga drejtësia shqiptare dhe ka pasur procese gjyqësore ndaj personave të lidhur me ish-strukturat e SHIK-ut. Megjithatë, gjetja e eshtrave të Hoxhës mbetet kërkesa kryesore e familjes.

Pas 31 vjetësh, familja kërkon që institucionet shqiptare të japin përgjigje përfundimtare për vendndodhjen e tij.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.