31 zjarre në hapësirë të hapur në vend, njëri ende aktiv – zjarri nga Kosova hyri në territorin e Maqedonisë së Veriut

Gjithsej 31 zjarre në hapësira të hapura janë regjistruar deri në orën 07:30 të mëngjesit, njoftoi Qendra për Menaxhim me Kriza (QMK). Prej tyre, një zjarr është ende aktiv, tre janë nën kontroll, ndërsa 27 janë shuar.

Aktiv mbetet zjarri pranë fshatit Graçani, i cili para dy ditësh kaloi nga territori i Kosovës në territorin e Maqedonisë së Veriut.

„Zjarri nuk paraqet rrezik për vendbanimet. Kryesisht digjen bar, shkurre dhe dëllinja të ulëta, të cilat krijojnë flakë të fuqishme dhe tym edhe më të madh. Në disa pjesë, zjarri lëviz pranë tokës përmes pyllit të përzier“, informoi mëngjesin e sotëm drejtori i Drejtorisë për Mbrojtje dhe Shpëtim, Stojançe Angellov.

Të mërkurën, krahas zjarrfikësve të Shkupit, në shuarjen e zjarrit morën pjesë edhe dy aeroplanë zjarrfikës Air Tractor të Drejtorisë për Mbrojtje dhe Shpëtim. Dje, një helikopter i policisë së Maqedonisë së Veriut u angazhua për t’u ndihmuar shërbimeve zjarrfikëse të Kosovës, duke shuar zjarrin nga ana e Kosovës, ku flakët ishin më intensive.

Ndërkohë, zjarrfikësit e Shkupit vazhduan intervenimin nga ana e territorit të Maqedonisë së Veriut.

„Mbrëmë era frynte në drejtim të Shkupit dhe tymi nga zjarri, i cili është aktiv si në territorin e Kosovës ashtu edhe në territorin e Maqedonisë së Veriut, mund të ndihej në disa lagje të Shkupit. Ky është i njëjti tym që të gjithë ne që punojmë në shuarjen e zjarreve në hapësira të hapura e thithim çdo ditë nga afër, në përqendrim shumë më të madh“, tha Angellov.

Ai shtoi se zjarrfikësit e Shkupit gjatë gjithë natës qëndruan në pjesë të vijës së zjarrit, por terreni i vështirë për t’u arritur e bëri shuarjen gjatë natës të vështirë ose të pamundur.

„Këtë mëngjes ata vazhdojnë shuarjen me një numër të shtuar zjarrfikësish, ndërsa mbështetje ajrore do të ofrojnë dy aeroplanë Air Tractor të Drejtorisë për Mbrojtje dhe Shpëtim, një helikopter i policisë dhe një helikopter i ushtrisë“, deklaroi Angellov.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.