Abdixhiku përkujton Enver Malokun, shpalos portretin përkujtimor të tij në LDK

Kryetari i Lidhjes Demokratike të Kosovës, Lumir Abdixhiku, përkujtoi 26 vjetorin e vrasjes së gazetarit dhe veprimtarit të shquar, Enver Maloku. Ai theksoi se më 11 janar të vitit 1999, Enver Maloku, një intelektual i rrallë dhe patriot i devotshëm, u vra në një kohë kur liria dhe pavarësia e Kosovës po kërkonin çdo sakrificë.

Abdixhiku nënvizoi se Maloku ishte një model i guximit dhe i përkushtimit ndaj lirisë, duke dhënë një kontribut të paçmuar në lëvizjen kombëtare për liri, pavarësi dhe demokraci. Ai përkujtoi se Enver Maloku ishte një simbol i lirisë së shprehjes dhe i forcës së fjalës, duke mbrojtur vlerat dhe interesat e kombit të tij.

Gjatë ceremonisë përkujtimore, Abdixhiku bashkë me familjen Maloku dhe veprimtarë të LDK-së, nderuan veprën dhe trashëgiminë e tij në Murin e Nderit në Selinë Qendrore të LDK-së, aty ku qëndrojnë emrat e atyre që ndihmuan në ndërtimin e Kosovës. Ai tha se idealet e Enver Malokut mbeten të gjalla dhe udhëzojnë Kosovën drejt një të ardhmeje të shëndoshë dhe të sigurt.

Lavdi jetës dhe veprës së Enver Malokut!