Ahmeti pas takimit me diplomaten e parë amerikane: Partneriteti me SHBA-të

Kryetari i Bashkimit Demokratik për Integrim (BDI), Ali Ahmeti, ka dhënë detaje nga takimi që zhvilloi me ushtruesen e detyrës së ambasadores së Shteteve të Bashkuara të Amerikës në Maqedoninë e Veriut, Nicole Varnes.

Sipas Ahmetit, në takim u diskutua për zhvillimet aktuale politike në vend, rëndësinë e forcimit të institucioneve demokratike, si dhe bashkëpunimin ndërmjet Maqedonisë së Veriut dhe Shteteve të Bashkuara.

Ai bëri të ditur se e falënderoi Varnes për angazhimin e saj dhe kontributin në forcimin e partneritetit mes dy vendeve, ndërsa vlerësoi rolin e SHBA-së si partner strategjik të Maqedonisë së Veriut dhe faktor të rëndësishëm për paqen, sigurinë dhe stabilitetin në rajon.

Ahmeti theksoi gjithashtu se gjatë bisedës rikonfirmoi përkushtimin për partneritetin strategjik me Shtetet e Bashkuara, zbatimin e Marrëveshjes së Ohrit dhe vazhdimin e rrugës evropiane të vendit.

Sipas tij, dialogu i vazhdueshëm me partnerët ndërkombëtarë mbetet i rëndësishëm për forcimin e institucioneve demokratike dhe ndërtimin e një shteti gjithëpërfshirës me të drejta dhe mundësi të barabarta për të gjithë qytetarët.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.