Alvarez bëhet problem te Atletico, klubi e hap derën për shitjen – por kërkon një ofertë marramendëse

“Wanda Metropolitano” i ktheu shpinën “Arañës”.

Ishte një pasdite makthi për Julian Alvarez, i cili e nisi ndeshjen e parë të sezonit në shtëpi kundër Villarrealit nga bankina dhe u vërshëllye gjatë gjithë kohës – para, gjatë dhe pas ndeshjes, e cila përfundoi 2-2.

Arsyeja tashmë dihet. Gjatë javëve të fundit, sulmuesi argjentinas ka bërë gjithçka për t’u larguar nga Atletico Madridi, duke e vendosur Barcelonën në krye të listës së tij të preferencave.

Megjithatë, drejtuesit e klubit madrilen kanë refuzuar vazhdimisht ta lejojnë largimin e tij, duke e krijuar një lloj “lufte të ftohtë” me drejtuesit e Barcelonës.

Fishkëllimat e djeshme, megjithatë, duket se e kanë përkeqësuar edhe më shumë një situatë tashmë shumë të tensionuar.

Për këtë arsye, edhe Atletico po fillon ta pyesë veten se sa kuptim ka ta mbajë një lojtar të pakënaqur, i cili tashmë është vënë kundër një pjese të madhe të tifozëve.

Sipas “The Athletic”, drejtuesit e “Los Colchoneros” po e shqyrtojnë seriozisht mundësinë e shitjes së Alvarezit, përcjell “Gazeta Express”.

Por ka një kusht: të mbërrijë një ofertë marramendëse prej rreth 150 milionë eurosh.

Gjatë orëve të fundit, Hansi Flick u pyet për mundësinë që Barcelona ta afrojë një sulmues.

Trajneri gjerman tha se do të flasë me drejtorin sportiv Deco për ta kuptuar nëse ekziston mundësia për ta përforcuar skuadrën.

Megjithatë, pengesa e vendosur nga Atletico për një transferim të Alvarezit në Barcelonë duket ende e qartë.

Në sfond mbetet Arsenali, i cili mund të përfitojë nga ditët e fundit të afatit kalimtar dhe nga një Julian Alvarez gjithnjë e më i trishtuar dhe i pakënaqur, për ta bërë goditjen e madhe dhe për ta rikthyer argjentinasin në Premierligë.

Burimi i lajmit: orainfo.net
Shënim: Ky material është përpunuar për qëllime informimi nga Portali lajme.mk.