Aleanca për Shqiptarët ka reaguar ndaj koalicionit qeverisës VLEN, duke ngritur akuza për mungesë të përfaqësimit të shqiptarëve në punësimet në institucionet publike.
Në reagimin e saj, Aleanca për Shqiptarët pretendon se nga 60 vende pune, asnjë nuk i ka takuar një shqiptari, duke e cilësuar këtë si rezultat të politikave të VLEN-it dhe heshtjes së përfaqësuesve të këtij koalicioni përballë asaj që partia e quan diskriminim.
“60 vende pune, asnjë shqiptar! Ky është rezultati i politikave të VLEN-it dhe i heshtjes së tyre përballë diskriminimit në institucionet publike”, thuhet në reagimin e Aleancës për Shqiptarët.
Nga kjo parti kanë kërkuar përgjegjësi nga ministrat e VLEN-it, duke vënë në pikëpyetje premtimet e tyre për përfaqësim të drejtë dhe adekuat të shqiptarëve në institucionet shtetërore.
“Ku janë ministrat e VLEN-it? Ku janë premtimet për përfaqësim të drejtë? Për karriget e tyre në Qeveri bëjnë zhurmë, ndërsa për vendet e punës së shqiptarëve heshtin!”, theksohet më tej në reagim.
Aleanca për Shqiptarët e përfundon reagimin me pyetjen se nëse kjo është mënyra e përfaqësimit që VLEN-i ua kishte premtuar shqiptarëve.
Në reagim nuk specifikohet se për cilin institucion apo konkurs bëhet fjalë. Pretendimi për 60 vendet e punës nuk është verifikuar në mënyrë të pavarur.
Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.
