Bashkimi Demokratik Boshnjak parashtron kallëzim penal ndaj Dalibor Kitanoviqit për glorifikimin e Ratko Mlladiqit

Bashkimi Demokratik Boshnjak (BDS) ka paraqitur pranë institucioneve kompetente kallëzim penal kundër Dalibor Kitanoviqit, drejtor aktual i Agjencisë për Realizimin e të Drejtave të Komuniteteve.

Siç njoftojnë nga partia, kallëzimi vjen për shkak të veprimtarisë së tij publike dhe një postimi të publikuar prej tij, përmes të cilit glorifikohet dhe lartësohet Ratko Mlladiqi, i dënuar përfundimisht si kriminel lufte.

Nga BDS e dënojnë ashpër këtë veprim, duke theksuar se është absolutisht e papranueshme që një bartës i funksionit publik, përmes veprimeve dhe mesazheve të tij publike, të relativizojë krimet e luftës dhe drejtpërdrejt të cenojë dinjitetin e viktimave.

Në komunikatën e partisë theks i veçantë i kushtohet edhe paradoksit të situatës, duke pasur parasysh institucionin që drejton Kitanoviqi.

“Veçanërisht e theksojmë përgjegjësinë që mban drejtori i një institucioni, roli themelor i të cilit është realizimi dhe mbrojtja e të drejtave të komuniteteve më të vogla, përkatësisht komuniteteve etnike më pak të përfaqësuara në Maqedoninë e Veriut. Nga një institucion i tillë dhe drejtuesit e tij presim respektim të të gjitha komuniteteve, dinjitetit të tyre, si dhe ndjeshmëri ndaj viktimave të krimeve të luftës”, thuhet në reagimin e Bashkimit Demokratik Boshnjak.

Tashmë opinioni publik pret reagim nga organet kompetente lidhur me kallëzimin penal të paraqitur, si dhe një deklarim të mundshëm nga vetë Kitanoviqi dhe institucioni që ai përfaqëson.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.