BDI: 0 shqiptarë mes fituesve të çmimit shtetëror “8 Shtatori” – edhe sukseset e shqiptarëve po bëhen të padukshme

Bashkimi Demokratik për Integrim (BDI) përmes një komunikate ka reaguar ndaj listës së sivjetshme të fituesve të çmimeve shtetërore “8 Shtatori”, duke treguar se mes të shpërblyerve nuk ka asnjë shqiptar. Nga kjo parti kërkojnë transparencë të plotë për kriteret dhe procedurën sipas së cilës janë zgjedhur fituesit.

Nga BDI thonë se mes të shpërblyerve për mirënjohjen më të lartë për vepër jetësore dhe shpërblimet financiare për arritje sportive nuk ka asnjë sportist, trajner apo përfaqësues tjetër shqiptar.

“0 shqiptarë. Asnjë sportist, asnjë trajner, asnjë përfaqësues shqiptar nuk ishte i denjë për këtë mirënjohje shtetërore”, thuhet në reagim.

Sipas BDI-së, mungesa e shqiptarëve nga lista nuk duhet të shihet vetëm si rezultat i përzgjedhjes së fituesve, por si një tregues i qëndrimit të institucioneve ndaj kontributit të shqiptarëve në sport dhe në fusha të tjera.

Nga partia theksojnë se sportistët shqiptarë e përfaqësojnë Maqedoninë e Veriut në garat ndërkombëtare, fitojnë medalje dhe prej viteve kontribuojnë në zhvillimin e sportit, por se sukseset e tyre, siç pretendojnë ata, nuk po njihen përmes mirënjohjeve shtetërore.

“Cili është kriteri për shkak të së cilit shqiptarët bëhen të padukshëm madje edhe kur bëhet fjalë për arritje sportive dhe profesionale? A është kjo ‘përfaqësimi i drejtë dhe adekuat’ që e premtonte VLEN-i? Apo është edhe një dëshmi tjetër se shqiptarët po trajtohen si qytetarë të rendit të dytë?”, pyesin nga BDI.

Nga partia kërkojnë të publikohen kriteret, procedura dhe përbërja e komisionit që ka vendosur për çmimet “8 Shtatori”.

“Për shkak se 0 shqiptarë nuk mund të jetë gjithmonë rastësi. Kur përjashtimi përsëritet, ai shndërrohet në politikë”, theksojnë nga BDI, duke shtuar se nuk do të heshtin, siç thonë ata, përballë politikës së diskriminimit dhe anashkalimit të kontributit të shqiptarëve në institucionet shtetërore.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.