Bekim Rexhepi: Korridori 8 mbetet në ngecje, Raporti i KE-së evidenton vonesat në projektet strategjike

Realizimi i Korridorit 8 dhe zhvillimi i infrastrukturës transportuese në Maqedoninë e Veriut po përballen me vonesa dhe mungesë të vazhdimësisë institucionale. Kështu vlerëson Bekim Rexhepi nga Bashkimi Demokratik për Integrim (BDI), duke iu referuar gjetjeve të Raportit të Komisionit Evropian për vendin.

Sipas Rexhepit, raporti nxjerr në pah dallimet në dinamikën e realizimit të projekteve strategjike, duke evidentuar se Korridori 10 ka shënuar përparim më të madh në krahasim me Korridorin 8.

Rexhepi thekson se një nga problemet e evidentuara është edhe mungesa e planit të veprimit për Strategjinë Kombëtare të Transportit 2018–2030, dokument kyç për orientimin dhe zbatimin e politikave infrastrukturore. Sipas tij, kjo situatë dëshmon mungesë të një qasjeje të koordinuar dhe të vazhdueshme në realizimin e projekteve me rëndësi strategjike.

Një tjetër çështje e ngritur në raport është ndërprerja e fazës së tretë të projektit hekurudhor të Korridorit 8, që përfshin lidhjen nga Kriva Pallanka deri në kufirin me Bullgarinë. Komisioni Evropian vlerëson se nevojiten përpjekje urgjente për përshpejtimin e punimeve dhe avancimin e këtij korridori, i cili ka rëndësi për lidhjen rajonale dhe integrimin e vendit në rrjetin evropian të transportit.

Raporti evidenton gjithashtu se, ndonëse janë shënuar hapa të caktuar në disa segmente rrugore, progresi i përgjithshëm në zhvillimin e rrjetit trans-evropian të transportit mbetet i kufizuar.

Përmes këtij qëndrimi, Bekim Rexhepi rikthen në vëmendje çështjen e realizimit të Korridorit 8, duke vënë theksin te nevoja për përgjegjësi institucionale, dinamikë konkrete të punimeve dhe zbatim të projekteve që kanë rëndësi për zhvillimin ekonomik dhe lidhjen e Maqedonisë së Veriut me vendet fqinje.

Raporti i Komisionit Evropian për Maqedoninë e Veriut është dokumenti që evidenton këto sfida dhe rekomandon përshpejtimin e projekteve të transportit, veçanërisht të lidhjes hekurudhore të Korridorit 8. Gazeta Flaka

The post Bekim Rexhepi: Korridori 8 mbetet në ngecje, Raporti i KE-së evidenton vonesat në projektet strategjike appeared first on Flaka, në çdo lajm... .

Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.