BOMBA E FABRIZIO ROMANOS: Modriç rinovon me Milanin, por Real Madridi e pret

Fabrizio Romano zbulon detaje të reja mbi të ardhmen e Luka Modriçit: kroati është plotësisht i fokusuar te Milani, ndërsa një rikthim në Real Madrid në të ardhmen nuk përjashtohet.

Luka Modriç ka vendosur të vazhdojë aventurën e tij me Milanin, pavarësisht pasigurive që shoqëruan klubin gjatë verës. Moskualifikimi për Ligën e Kampionëve dhe largimi i trajnerit Massimiliano Allegri bënë që shumëkush të mendonte se aventura e kroatit në “San Siro” do të zgjaste vetëm një sezon.

Megjithatë, 41-vjeçari zgjodhi të rinovojë kontratën me kuqezinjtë dhe do të jetë pjesë e Milanit edhe për sezonin 2026/27, nën drejtimin e trajnerit të ri Ruben Amorim.

Sipas gazetarit të njohur Fabrizio Romano, Modriç është aktualisht i përqendruar tërësisht te Milani, edhe pse lidhja e tij me Real Madridin mbetet shumë e fortë, përcjell ORAinfo.

“Real Madridi është shtëpia e tij”

Duke folur në kanalin e tij në YouTube, Romano theksoi se Modriç nuk e ka fshehur dëshirën për t’u rikthyer një ditë në Madrid.

“Siç i ka thënë Luka Modriç ‘Marca’-s ditët e fundit, Real Madridi është shtëpia e tij dhe ai shpreson të rikthehet një ditë te ‘Los Blancos’”, u shpreh Romano.

Sipas tij, presidenti i Real Madridit, Florentino Perez, e sheh Modriçin si një figurë të rëndësishme edhe për të ardhmen e klubit, por jo domosdoshmërisht në fushën e lojës.

“Florentino Perez e pret personalisht në Real Madrid. Gjatë zgjedhjeve të fundit, të cilat i fitoi, ai kishte kontaktuar tashmë njerëz pranë Modriçit për të diskutuar mundësinë që kroati të marrë një rol drejtues në klub një ditë. Natyrisht, nuk po flasim për fushën, por për drejtimin e klubit”, shtoi Romano.

Modriç zgjodhi Milanin në një moment të vështirë

Romano vlerësoi veçanërisht vendimin e Modriçit për të qëndruar te Milani, pavarësisht ndryshimeve të mëdha në klub.

“Luka është plotësisht i fokusuar te Milani. Ai zgjodhi të qëndrojë në një moment pasigurie, në fillim të qershorit, kur situata në klub ishte e paqartë”, tha gazetari italian.

Ndërkohë, largimi i drejtuesve dhe i trajnerit Allegri, me të cilin Modriç kishte krijuar një marrëdhënie shumë të mirë, nuk e ndryshoi vendimin e mesfushorit.

“Ai zgjodhi Milanin si një milanist i vërtetë, si një njeri që nuk e braktis anijen në momente vështirësie”, theksoi Romano.

Rikthimi në Madrid mund të presë

Edhe pse Real Madridi e sheh Modriçin si një kandidat për një rol drejtues në të ardhmen, vendimi për momentin është i qartë.

“Modriç është 100% i fokusuar te Milani dhe te mundësia për të dhënë më të mirën me fanellën kuqezi. Real Madridi mund ta presë, por ritmin do ta përcaktojë vetë Modriç”, përfundoi Romano. /ORAinfo/

Burimi i lajmit: orainfo.net
Shënim: Ky material është përpunuar për qëllime informimi nga Portali lajme.mk.