Brukseli godet rëndë drejtësinë në Maqedoni: Korrupsioni mbetet pa ndëshkim, politika mban nën presion gjykatat!

Komisioni Evropian ka lëshuar kritika të ashpra ndaj Maqedonisë së Veriut, duke konstatuar se vendi nuk ka shënuar përparim në luftën kundër korrupsionit gjatë vitit të fundit.

Në Raportin e Progresit për vitin 2026, Brukseli paralajmëron se rastet e korrupsionit të nivelit të lartë zvarriten dhe shpesh parashkruhen, duke krijuar përshtypjen e pandëshkueshmërisë.

Kritika të veçanta adresohen ndaj ndërhyrjeve politike në gjyqësor dhe ndryshimeve të Kodit Penal, të cilat nuk kanë eliminuar pasojat negative të ndërhyrjeve ligjore të vitit 2023.

Raporti zbulon se gjatë vitit 2025 janë realizuar vetëm 23% e masave të Strategjisë Kundër Korrupsionit, ndërsa sistemit të drejtësisë i mungojnë 221 gjyqtarë dhe 67 prokurorë.

Komisioni Evropian kërkon pavarësi reale të gjyqësorit, forcim të institucioneve dhe rezultate konkrete në ndjekjen e korrupsionit, veçanërisht të zyrtarëve të lartë.

Mesazhi i Brukselit është alarmues: pa drejtësi të pavarur dhe luftë efektive kundër korrupsionit, besimi në institucionet shtetërore vazhdon të dobësohet.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.