Dehari në “seancë” me vizitorë nga diaspora, Kuvendi: U pritën 432 bashkatdhetarë, aktiviteti vazhdon edhe nesër

Kuvendi i Kosovës ka njoftuar për pritjen që iu kanë bërë vizitorëve nga diaspora në kuadër të një aktiviteti të nisur “Bashkatdhetarët në Kuvend”.

Në foton e parë të ndarë nga Kuvendi shihet kryesuesi i seancës konstituive, Avni Dehari, derisa po priste mërgimtarët.

“432 bashkatdhetarë nga vende të ndryshme të botës janë pritur nga deputetë të Kuvendit dhe zyrtarë të administratës, të cilët i kanë shoqëruar ata gjatë vizitës dhe i kanë informuar për punën, funksionimin dhe rolin e institucionit më të lartë përfaqësues të vendit”, tha Kuvendit.

Derisa dyert e Kuvendit u hapën për bashkatdhetarët, konstituimi i Kuvendit ka mbetur i papërfunduar dhe ende s’dihet se kur do të thirret vazhdimi i seancës nga deputeti i Vetëvendosjes, Dehari.

Njoftimi i plotë i Kuvendit:

Vazhdon pritja e bashkatdhetarëve në Kuvend

Ka vazhduar sot aktiviteti “Bashkatdhetarët në Kuvend”, me pritjen e qindra bashkatdhetarëve në ambientet e Kuvendit të Republikës së Kosovës.

432 bashkatdhetarë nga vende të ndryshme të botës janë pritur nga deputetë të Kuvendit dhe zyrtarë të administratës, të cilët i kanë shoqëruar ata gjatë vizitës dhe i kanë informuar për punën, funksionimin dhe rolin e institucionit më të lartë përfaqësues të vendit.

Gjatë vizitës, bashkatdhetarët kanë pasur mundësi të njihen nga afër me hapësirat e Kuvendit, përfshirë sallën plenare, si dhe me historikun dhe veprimtarinë e këtij institucioni.

Pjesëmarrësit kanë shprehur interesim të veçantë për punën e Kuvendit dhe zhvillimet institucionale në vend, ndërsa vizita ka shërbyer edhe si mundësi për bashkëbisedim të drejtpërdrejtë me përfaqësuesit e zgjedhur.

Aktiviteti “Bashkatdhetarët në Kuvend” synon të afrojë mërgatën me institucionet e Republikës së Kosovës, duke u mundësuar bashkatdhetarëve që gjatë qëndrimit të tyre në Kosovë të vizitojnë Kuvendin dhe të njihen më nga afër me punën e tij.

Aktiviteti vazhdon edhe nesër, nga ora 12:00 – 16:00.

Mediat ndërkaq mund të marrin pamje në fillim të aktivitetit.

Burimi i lajmit: orainfo.net
Shënim: Ky material është përpunuar për qëllime informimi nga Portali lajme.mk.