Dy zjarre në Shkup: Autobusi drejt Vodnos përfshihet nga flakët, digjet edhe një veturë

Dy incidente me zjarr janë regjistruar sot në Shkup, njëri në shpatet e Vodnos, ndërsa tjetri në një nga kryqëzimet e frekuentuara të qendrës së qytetit.

Një autobus i Ndërmarrjes së Transportit Publik në Shkup, që qarkullonte në linjën 25 drejt Vodnos, është përfshirë nga zjarri pranë pikës së vëzhgimit të Vodnos së Mesme.

Sipas Drejtorisë për Mbrojtje dhe Shpëtim, në shuarjen e zjarrit kanë ndërhyrë dy automjete zjarrfikëse dhe shtatë zjarrfikës nga Brigada e Zjarrfikësve të Shkupit.

Reagimi i shpejtë i shoferit ka qenë vendimtar. Ai e ka larguar dhe parkuar autobusin në një hapësirë të përshtatshme, duke shmangur rrezikun që flakët të përhapeshin në ambientin përreth dhe në pyllin e Vodnos.

Nga incidenti nuk raportohet për persona të lënduar.

Ndërkohë, ekipet kompetente po kryejnë kontrollet teknike për të përcaktuar shkakun e saktë të zjarrit në autobus.

Zjarr edhe në qendër të Shkupit

Një tjetër incident është regjistruar në të njëjtën ditë në qendër të kryeqytetit.

Një veturë është përfshirë nga zjarri në kryqëzimin pranë Qendrës Tregtare Mavrovasja, ku gjithashtu kanë ndërhyrë zjarrfikësit.

Edhe në këtë rast nuk raportohet për persona të lënduar.

Dy incidentet kanë shkaktuar shqetësim te qytetarët, ndërsa autoritetet pritet të japin më shumë detaje për shkaqet e zjarreve. Gazeta Flaka

The post Dy zjarre në Shkup: Autobusi drejt Vodnos përfshihet nga flakët, digjet edhe një veturë appeared first on Flaka, në çdo lajm... .

Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.