E dhimbshme: Sot varroset 20-vjeçari që humbi jetën në aksidentin në Lutogllav

Sot do t’i jepet lamtumira e fundit 20-vjeçarit Orlent Xhafiqi, i cili humbi jetën në aksidentin e rëndë të trafikut që ndodhi në orët e para të mëngjesit të djeshëm në fshatin Lutogllav të Prizrenit.

Varrimi i të ndjerit do të bëhet me drekë, në varrezat e fshatit Piranë, kanë njoftuar familjarët.

Xhafiqi humbi jetën pasi vetura “VW Passat”, me të cilën po udhëtonte në drejtimin Suharekë–Prizren, doli nga rruga në afërsi të shkollës fillore “Besim Ndrecaj”.

I riu 20-vjeçar ishte i njohur në komunitet edhe për angazhimin e tij në punë vullnetare dhe kontributin në të mirë të komunitetit, ndërsa ndër aktivitetet e tij ishte edhe rregullimi i dyerve në shkolla.

Në këtë aksident u lëndua edhe drejtuesi i automjetit, 19-vjeçari Yll Latifi, i cili u trajtua në Spitalin e Prizrenit. Me urdhër të prokurorit, ai është ndaluar në mbajtje.

Familjarët kanë shprehur dhimbjen për ndarjen e parakohshme të Orlentit, duke kërkuar që i ndjeri të kujtohet për kontributin dhe të mirat që ka bërë për komunitetin.

“Allahu e mëshiroftë dhe e shpërbleftë me Xhenet.”

Burimi i lajmit: orainfo.net
Shënim: Ky material është përpunuar për qëllime informimi nga Portali lajme.mk.