EVN Maqedoni dhe Rade Konçar-TEP thellojnë bashkëpunimin për përfshirjen e nxënësve me aftësi të kufizuara

EVN Maqedoni dhe Rade Konçar-TEP po e zgjerojnë bashkëpunimin e tyre me fokus në përfshirjen e nxënësve me aftësi të kufizuara, krijimin e mundësive të barabarta dhe zhvillimin e qëndrueshëm, në përputhje me parimet ESG, njofton Gazeta Flaka

Në ambientet e Rade Konçar-TEP u mbajt ngjarja me moton „Partneritete për përfshirje: Nga angazhimet ESG drejt aktiviteteve konkrete“, ku u prezantuan rezultatet e partneritetit të deritanishëm ndërmjet dy kompanive.

Në kuadër të bashkëpunimit, Rade Konçar-TEP do të punësojë nxënës me aftësi të kufizuara, të cilët do të angazhohen në procese prodhuese për nevojat e EVN Maqedonisë.

Në ngjarje morën pjesë ministrja e Energjisë, Minierave dhe Burimeve Minerale, Sanja Bozhinovska, drejtori i përgjithshëm i Rade Konçar-TEP, Goran Antevski, kryetari i Bordit Drejtues të EVN Maqedonisë, Vollfgang Maier, si dhe përfaqësues të institucioneve dhe kompanive.

Ministrja Bozhinovska e përshëndeti iniciativën, duke theksuar rëndësinë e krijimit të mundësive konkrete për përfshirjen dhe pjesëmarrjen e barabartë të të rinjve në shoqëri dhe në mjedisin e punës.

„Më gëzon veçanërisht fakti që sot jemi dëshmitarë të një projekti që tregon se përfshirja mund të jetë pjesë përbërëse e proceseve reale të biznesit. Iniciativa të tilla janë shembull i drejtimit në të cilin duhet të zhvillohen partneritetet e ardhshme“, deklaroi Bozhinovska.

Ajo shtoi se pret që në të ardhmen të ketë më shumë përfshirje të kompanive dhe institucioneve në projekte që krijojnë mundësi konkrete për të rinjtë.

Në kuadër të aktiviteteve të përbashkëta, EVN Maqedoni ka realizuar edhe projektin „EVN për mjedisin“, përmes të cilit edukimi mjedisor është ndërlidhur me diversitetin, barazinë dhe përfshirjen.

Në projekt morën pjesë nxënës nga 10 shkolla të specializuara dhe qendra burimore nga mbarë vendi. Përmes aktiviteteve edukative dhe kreative, ata krijuan vepra artistike me mesazhe për mbrojtjen e mjedisit, ndërsa tre institucione përfituan donacione në përputhje me nevojat e tyre arsimore.

Kryetari i Bordit Drejtues të EVN Maqedonisë, Vollfgang Maier, tha se rëndësia e iniciativës qëndron në mundësinë që të rinjtë t’i zbatojnë njohuritë dhe aftësitë e tyre në një mjedis real pune.

„Si sektor i biznesit, mund të kontribuojmë jo vetëm me mbështetje financiare, por edhe duke krijuar mundësi reale punësimi dhe duke i përfshirë njerëzit në procese në të cilat mund të japin kontributin e tyre“, tha Maier.

Ai theksoi se përmes partneritetit me Rade Konçar-TEP po krijohet mundësi për përfshirje të drejtpërdrejtë të nxënësve në procesin e punës dhe në prodhim për nevojat e EVN Maqedonisë.

Drejtori i përgjithshëm i Rade Konçar-TEP, Goran Antevski, tha se për kompaninë një partneritet i suksesshëm nuk matet vetëm përmes rezultateve të biznesit, por edhe përmes vlerës që krijohet për shoqërinë.

„Besoj se ky është vetëm fillimi dhe se në të ardhmen do të vazhdojmë me bashkëpunim edhe më intensiv, ide dhe projekte të reja, përmes të cilave së bashku do të krijojmë mundësi reale për të rinjtë dhe ndryshime pozitive në komunitet“, theksoi Antevski.

Gjatë ngjarjes u prezantuan aktivitetet, rezultatet dhe objektivat e partneritetit, si dhe mundësitë që iniciativa krijon për zhvillimin e aftësive dhe fitimin e përvojës së punës nga të rinjtë.

Sipas organizatorëve, bashkëpunimi ndërmjet EVN Maqedoni dhe Rade Konçar-TEP synon ta shndërrojë përfshirjen sociale në mundësi konkrete për punësim, zhvillim të aftësive dhe pjesëmarrje të të rinjve në një mjedis real pune.

The post EVN Maqedoni dhe Rade Konçar-TEP thellojnë bashkëpunimin për përfshirjen e nxënësve me aftësi të kufizuara appeared first on Flaka, në çdo lajm... .

Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.