Gjykata vendos, një muaj paraburgim për Gani Gecin

Gjykata Themelore në Prishtinë ka nxjerrë aktvendim për ish-deputetin e LDK-së, Gani Gecin, pas seancës dëgjimore, të mbajtur sot.

Sipas vendimit, Gani Gecit iu është caktuar një muaj paraburgim. Ai dyshohet për kanosje ndaj gazetarit Lirim Mehmetaj.

Mehmetaj dyshohet se u kanos nga Geci për shkak të një postimi në Facebook për deputetin e Vetëvendosjes, Fatos Geci, i cili është nip i Gani Gecit.

Sipas Prokurorisë, Geci kishte shkuar në vendin e punës të gazetarit Mehmetaj dhe i kishte kërkuar atij ta fshijë këtë postim. Pas refuzimit të gazetarit, Geci e ka kanosur drejtpërdrejt me fjalët: “Nëse nuk e hek postimin ose nuk e ndryshon, kena me u vra“.

Një ditë pasi e kishte kanosur në zyrën e tij Mehmetajn dhe pasi ky e kishte raportuar në polici, Geci me veturën e tij ishte parkuar para televizionit Dukagjini ku gazetari ishte në një emision dhe e kishte pritur. Më pas Geci u arrestua dhe u ndalua për 48 orë. /Indeksonline

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.