“Gropa” prej 110 milionë eurosh në arkën e shtetit, Mickoski paralajmëron rishikim urgjen të buxhetit

Qeveria e Maqedonisë së Veriut po shqyrton futjen e buxhetit në një rishikim të ri për të mbuluar pamjaftueshmërinë e të hyrave financiare që kap vlerën e rreth 113.8 milionë eurove (rreth 7 miliardë denarë).

Kryeministri Hristijan Mickoski konfirmoi se hendeku financiar ka ardhur si rezultat i uljes së të hyrave nga akcizat, ku vetëm nga ky zë mungojnë rreth 81.3 milionë euro (5 miliardë denarë), si dhe nga mbledhja më e ulët e TVSH-së, por siguroi se stabiliteti ekonomik dhe fuqia blerëse e qytetarëve nuk do të cenohen, përcjell INA.

Sipas tij, përpjekjet e qeverisë po fokusohen në mbajtjen e inflacionit nën mesataren evropiane, pasi normat e shënuara në muajt e fundit (2.3% në korrik dhe 2.6% në gusht) tregojnë një ecuri të kontrolluar të tregut.

Pas rishikimit të parë të kryer në korrik, ku të hyrat totale u projektuan në 6.17 miliardë euro (379.5 miliardë denarë) dhe shpenzimet në 6.92 miliardë euro (425.8 miliardë denarë), bilanci i fundit i Numëruesit Fiskal tregon se deri në fund të shtatorit shteti ka realizuar 4.21 miliardë euro të hyra (259.3 miliardë denarë) përkundrejt 4.87 miliardë eurove shpenzime (299.69 miliardë denarë). (INA)

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.