I akuzuar për katër vrasje, para gjykatës pranon dy – prokuroria e ballafaqon me dëshminë e mëparshme

Në Gjykatën Themelore të Kumanovës ka vazhduar gjykimi ndaj Trajçe Bojkovskit nga Staro Nagoriçani, i akuzuar për vrasjen e katër grave dhe dy tentativa për vrasje. Në seancën e sotme ai pranoi dy vrasje, ndërsa për rastet e tjera dha përgjigje kontradiktore dhe njërën prej vrasjeve e mohoi.
Bojkovski pranoi se kishte vrarë Marija Marinkovskën dhe Mira Stankovskën, ndërsa ndryshoi deklaratat lidhur me Janka Antevska dhe Stançe Karevska. Prokurori Ljubomir Lape e ballafaqoi me dëshminë e dhënë më 8 maj në Prokurori, ku, sipas akuzës, kishte pranuar katër vrasje.
Në gjykatë u dëgjua edhe eksperti i psikiatrisë, prof. dr. Stojan Bajraktarov. Sipas ekspertizës, te i akuzuari nuk është konstatuar sëmundje psikike që do ta pengonte të kuptonte veprimet e tij apo të ndiqte procesin gjyqësor. Eksperti deklaroi se Bojkovski ka qenë i përgjegjshëm për veprimet e tij dhe se mund ta ndjekë procedurën.
Ekspertiza ka evidentuar gjithashtu karakteristika psikopatike dhe çrregullime të sjelljes seksuale, ndërsa është vlerësuar edhe rreziku i përsëritjes së veprave.
Prokurori Lape deklaroi se, përveç dëshmive të mëparshme të të akuzuarit, ekzistojnë edhe prova materiale që mbështesin aktakuzën.
Procedura e provave është mbyllur, ndërsa fjalët përfundimtare janë caktuar për 6 tetor.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.