Investim i ri në ngrohjen qendrore në Shkup! Mbi 500 familje pritet të përfitojnë nga sistemi i ri

Ministri i Mjedisit Jetësor dhe Planifikimit Hapësinor, Muamet Hoxha, gjatë një vizite në objektin e ri kogjenerues të kompanisë “Tesa Energy”, bëri të ditur se mbi 500 familje nga komunat Çair dhe Butel po përfshihen në rrjetin e ri të ngrohjes qendrore. Bëhet fjalë për një investim privat prej 2,5 milionë eurosh, i cili, sipas Hoxhës, synon furnizim më efikas me energji termike dhe elektrike, si dhe uljen e ndotjes së ajrit në kryeqytet.

Ministri theksoi se energjia termike nga ky sistem do të jetë 20 për qind më e lirë krahasuar me alternativat e tjera të ngrohjes qendrore. Në rrjet parashihet të përfshihen edhe institucione publike, përfshirë spitalin e gjinekologjisë dhe obstetrikës “Nënë Tereza” në Çair dhe shkollën fillore “Hasan Prishtina”. Hoxha u bëri thirrje edhe familjeve dhe bizneseve të tjera të zonës që të kyçen në sistemin e ri.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.