Kafeja mund të bëhet deri në 300 për qind më e shtrenjtë

Kafeja, lëngu i portokallit ose petullat mund të pësojnë një rritje të ndjeshme çmimi nëse Brukseli zbaton një plan sipas të cilit ushqimi i importuar do të duhet të respektojë rregullat e rrepta të Bashkimit Evropian për pesticidet.

Analiza e Qendrës së Përbashkët Kërkimore (JRC), shërbimi shkencor i Komisionit Evropian, konfirmon paralajmërimet e prodhuesve jashtë BE-së: ndalimi qoftë edhe i gjurmëve më të vogla të disa prej pesticideve më të rrezikshme – përdorimi i të cilave është i ndaluar në Union për shkak të rreziqeve shëndetësore dhe mjedisore – mund të zvogëlojë ofertën dhe të rrisë çmimet, njofton Tportal.

Në skenarin më të pafavorshëm hipotezor, në të cilin prodhuesit jashtë BE-së nuk do të përshtateshin fare me rregullat e reja, çmimi i kafesë mund të rritet deri në 332 për qind, ndërsa ai i agrumeve me 82 për qind, deklaron JRC, siç transmeton Politico.

Importi i produkteve bujqësore në BE do të zvogëlohej për 41 për qind, ndërsa blegtorët do të paguanin ushqim më të shtrenjtë për kafshët.

Edhe në skenarët më realistë, në të cilët prodhuesit e huaj do t’i përshtateshin kërkesave të reja në shkallë të ndryshme, çmimet për konsumatorët do të rriteshin dhe importet do të binin. Në të njëjtën kohë, prodhuesit brenda BE-së do të shënonin rritje.

Ndalimi i propozuar për mbetjet e pesticideve është pjesë e paketës për sigurinë e ushqimit dhe ushqimit të kafshëve dhe mbështetet nga fermerët evropianë. Ata kanë paralajmëruar prej kohësh se duhet t’i përmbahen rregullave shumë më të rrepta sesa konkurrentët nga vendet e treta. Kjo masë u ideua pjesërisht si përgjigje ndaj pakënaqësisë së tyre me marrëveshjen tregtare të BE-së me Mercosur, e cila përbëhet nga Argjentina, Brazili, Paraguaji dhe Uruguaji./INA/

The post Kafeja mund të bëhet deri në 300 për qind më e shtrenjtë appeared first on InfoShqip.com.

Burimi i lajmit: infoshqip.com
Shënim: Ky material është përpunuar për qëllime informimi nga Portali lajme.mk.