Kaos në Tabanoc: “Qyteti i Sigurt” bllokon kufirin, kolona drejt Serbisë arrin 15 kilometra

Mijëra udhëtarë, mes tyre shumë familje me fëmijë, kanë mbetur mbrëmë në një kolonë të gjatë prej më shumë se 15 kilometrash në pikën kufitare Tabanoc, në dalje nga Maqedonia e Veriut drejt Serbisë.

Qarkullimi është zhvilluar jashtëzakonisht ngadalë, ndërsa udhëtarët kanë raportuar se në disa pjesë automjetet kanë qëndruar të bllokuara për më shumë se 20 minuta.

Sipas raportimeve, shkak i vonesave është bërë fillimi i zbatimit të sistemit “Qyteti i Sigurt” (Safe City) për automjetet e huaja, i cili mundëson evidentimin automatik të kundërvajtjeve dhe gjobave në komunikacion.

Sistemi ka nisur të zbatohet edhe për automjetet e huaja që dalin nga vendi, ndërsa në kufi janë krijuar vonesa gjatë përpunimit dhe verifikimit të të dhënave. Kjo ka shkaktuar ngushtime në pikat e kontrollit dhe ka ngadalësuar ndjeshëm qarkullimin.

Në rrjetet sociale janë publikuar video dhe fotografi ku shihen radhë të gjata automjetesh në pritje për të kaluar kufirin. Udhëtarët e revoltuar u kanë bërë thirrje atyre që planifikojnë të udhëtojnë përmes Maqedonisë së Veriut të shmangin përkohësisht pikën kufitare Tabanoc ose të përdorin rrugë alternative, deri në normalizimin e situatës.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.