Konfirmohet rasti i 5-të i fruthit, Klekovski: Fëmijët me simptoma të mos shkojnë në shkollë

Në Maqedoni është konfirmuar rasti i pestë i fruthit (morbileve), këtë herë te një foshnjë njëvjeçare e gjysmë, njoftoi ministri i Shëndetësisë, Sasho Klekovski.
Deri më tani, sëmundja është regjistruar te tri foshnja, një 45-vjeçar dhe një shtetas i Kosovës. Sipas Klekovskit, ekziston një lidhje e mundshme epidemiologjike mes rasteve, e cila pritet të konfirmohet nga Instituti i Shëndetit Publik.
Ministri u bëri thirrje prindërve që fëmijët me simptoma të mos i dërgojnë në çerdhe apo shkollë, por fillimisht të konsultohen me mjekun. Ai theksoi se virusi është jashtëzakonisht ngjitës dhe mund të qëndrojë në ajër deri në dy orë.
Autoritetet apelojnë që qytetarët të kontrollojnë statusin e vaksinimit, ndërsa Organizata Botërore e Shëndetësisë thekson se mbulimi me vaksinim duhet të arrijë 95 për qind për të siguruar mbrojtje të popullatës.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.