“Kosova po blindohet për 16 shtatorin?” – Policia del me sqarim, flet edhe për rrezikun nga provokimet prej jashtë vendit

Policia e Kosovës ka reaguar ndaj raportimeve të disa mediave se vendi po “blindohet” në prag të zhvillimeve të 16 shtatorit, duke i cilësuar masat e planifikuara të sigurisë si procedura të rregullta policore që aplikohen sa herë pritet pjesëmarrje e madhe e qytetarëve apo zhvillime me interes publik.

Përmes një njoftimi për media, Policia ka bërë të ditur se hartimi i planeve operative dhe ndërmarrja e masave shtesë të sigurisë nuk paraqesin situatë të jashtëzakonshme, por janë pjesë e praktikës së zakonshme institucionale.

Sipas Policisë, masa të ngjashme janë ndërmarrë edhe gjatë marshit solidarizues paqësor të 12 shtatorit, si dhe në tubime e aktivitete të tjera ku pritet numër i madh pjesëmarrësish.

Planifikimi, sipas njoftimit, bëhet për menaxhimin e sigurt të tubimeve, ruajtjen e rendit dhe sigurisë publike, menaxhimin e trafikut rrugor dhe garantimin e mbarëvajtjes së aktiviteteve.

Megjithatë, Policia ka konfirmuar se në vlerësimet e saj merret parasysh edhe një skenar tjetër.

Institucioni i sigurisë thotë se nuk përjashtohet mundësia që individë apo elemente të caktuara, përfshirë edhe persona nga jashtë Kosovës, të tentojnë t’i shfrytëzojnë grumbullimet e mëdha për provokime, incidente apo veprime destabilizuese.

Sipas Policisë, pikërisht për këtë arsye masat preventive përshtaten me numrin e pritshëm të pjesëmarrësve dhe me vlerësimin e përgjithshëm të situatës së sigurisë.

Policia u ka bërë thirrje qytetarëve dhe mediave që të mbështeten në informacione zyrtare dhe të shmangin përhapjen e pretendimeve të pakonfirmuara, veçanërisht kur ato mund të krijojnë perceptim të gabuar për gjendjen e sigurisë dhe shqetësim të panevojshëm në opinion.

Reagimi vjen pas raportimeve se Kosova po ndërmerr masa të jashtëzakonshme sigurie në prag të 16 shtatorit, pretendime të cilat Policia i ka relativizuar, duke sqaruar se bëhet fjalë për planifikime standarde operative.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.