Kush është Altin Dumani, dibrani sy patrembur që u ka futur ethet politikanëve: i vetmi prokuror që çoi në burg zyrtarë të lartë

Altin Dumani ka lindur më 24 tetor 1974 në Shupenzë të Dibrës. Karrierën në drejtësi e nisi në vitin 1999 si oficer i Policisë Gjyqësore në Prokurorinë e Sarandës.

Në vitin 2000 mori drejtimin e Prokurorisë së Tropojës, në një periudhë të vështirë për zonën. Më pas kaloi në Prokurorinë për Krime të Rënda dhe në Prokurorinë e Tiranës, ku u përfshi në hetime të rëndësishme kundër krimit të organizuar dhe korrupsionit.

Një nga dosjet më të njohura ku Dumani ka qenë pjesë e grupit të prokurorëve është ajo e Gërdecit. Gjatë procesit gjyqësor ai kërkoi burgim të përjetshëm për tre nga të pandehurit kryesorë.

Gjatë karrierës së tij ka qenë i përfshirë edhe në hetime të tjera të rëndësishme kundër krimit të organizuar dhe korrupsionit, përfshirë dosje që çuan në arrestimin e personave me pushtet dhe funksionarëve të lartë.

Në vitin 2019 u emërua prokuror në SPAK, ndërsa në dhjetor 2022 u zgjodh drejtues i këtij institucioni. Nën drejtimin e tij, SPAK zhvilloi disa prej hetimeve më të bujshme ndaj zyrtarëve të lartë në Shqipëri.

Mes rasteve më të bujshme janë arrestimi i ish-presidentit Ilir Meta dhe vendosja në arrest me burg e ish-kryebashkiakut të Tiranës, Erion Veliaj, gjatë hetimeve të SPAK.

Për shumë shqiptarë, emri i Altin Dumanit është lidhur me një periudhë të re të drejtësisë, ku hetimet kanë prekur edhe figura politike që për vite me radhë kanë qenë në nivelet më të larta të pushtetit.

Nga Tropoja te Gërdeci dhe më pas në krye të SPAK, Dumani është përballur me disa prej dosjeve më të vështira të drejtësisë shqiptare.

Ai konsiderohet një prej prokurorëve që ka pasur rol në goditjen e korrupsionit dhe krimit të organizuar në nivele të larta, duke çuar hetimet edhe te figura të rëndësishme politike.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.