Kuvendi me qëndrim të përbashkët për Hagën, miraton Deklaratën për aktgjykimin ndaj ish-krerëve të UÇK-së

Kuvendi i Kosovës, me 99 vota për, asnjë kundër dhe asnjë abstenim, ka miratuar Deklaratën për aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.

Deklarata, e iniciuar nga Partia Demokratike e Kosovës dhe e harmonizuar me të gjitha grupet parlamentare shqiptare, shpreh shqetësimin e Kuvendit lidhur me aktgjykimin e shkallës së parë, si dhe me atë që në deklaratë cilësohet si mungesë transparence dhe shkelje e standardeve të gjykimit të drejtë.

Kuvendi e konsideron të papranueshëm përfundimin për ekzistencën e një qëllimi të përbashkët kriminal dhe përgjegjësinë e atribuuar mbi këtë bazë ndaj katër ish-krerëve të Ushtrisë Çlirimtare të Kosovës.

Përmes deklaratës, Kuvendi u kërkon institucioneve të Kosovës të ndërmarrin veprimet e nevojshme për mbrojtjen e së vërtetës dhe të asaj që e cilëson si pastërtia e luftës çlirimtare. Po ashtu, bëhet thirrje për hartimin e një strategjie të përbashkët shtetërore, ku do të bashkërendoheshin veprimet juridike, institucionale dhe diplomatike.

Në deklaratë rikujtohet konteksti i luftës së Kosovës gjatë viteve 1998–1999, duke e lidhur atë me represionin dhe krimet e kryera nga regjimi i Sllobodan Millosheviqit ndaj popullsisë shqiptare.

Kuvendi thekson gjithashtu rëndësinë e ndërhyrjes së NATO-s në ndalimin e dhunës dhe çlirimin e Kosovës, si dhe mbështetjen e aleatëve perëndimorë për Kosovën.

Një pikë e deklaratës i referohet edhe mandatit të Dhomave të Specializuara, ku Kuvendi kërkon që ky institucion ta respektojë mandatin në përputhje me vullnetin e Kuvendit të Republikës së Kosovës.

Në deklaratë kundërshtohet çdo përpjekje për të vënë në dyshim luftën çlirimtare të Kosovës apo për ta barazuar popullin që luftoi për liri dhe mbijetesë me regjimin që e shtypi atë.

Në përmbyllje, Kuvendi thekson se e vërteta e luftës çlirimtare, drejtësia për viktimat dhe familjet e tyre, si dhe e drejta e të dënuarve për një gjykim të drejtë, janë pjesë e së njëjtës përgjegjësi institucionale.

Më poshtë, teksti i plotë i Deklaratës:

AKTGJYKIMIN E DHOMAVE TË SPECIALIZUARA NË HAGË NDAJ HASHIM THAÇIT, KADRI VESELIT, JAKUP KRASNIQIT DHE REXHEP SELIMIT

Kuvendi i Republikës së Kosovës, si institucioni përfaqësues i qytetarëve dhe shprehje e vullnetit të tyre demokratik, në seancën plenare të mbajtur më 28.09.2026;

Duke kujtuar se liria dhe pavarësia e Kosovës janë fryt i një përpjekjeje të gjatë për dinjitet njerëzor, barazi dhe të drejtën e një populli për të vendosur vetë për të ardhmen e tij;

Duke rikujtuar se lufta e popullit për liri dhe pavarësi përmes Ushtrisë Çlirimtare të Kosovës lindi në rrethanat e represionit sistematik dhe krimeve gjenocidale të Serbisë, kur popullit të Kosovës po i mohoheshin të drejtat themelore dhe vetë mundësia për të jetuar i lirë në vendin e tij;

Duke njohur rëndësinë vendimtare të ndërhyrjes së NATO-s për ndalimin e dhunës ndaj popullit të Kosovës dhe për çlirimin e vendit.

Duke theksuar se asnjë aktgjykim nuk mund ta zhbëjë të vërtetën historike të luftës në Kosovë. Serbia ushtroi gjenocid e krime kundër njerëzimit; zhvilloi një fushatë të egër terrori dhe spastrimi etnik në Kosovë; masakroi civilë të pafajshëm, vrau fëmijë, gra e të moshuar, dhunë seksuale si armë lufte, dëboi me forcë popullsinë dhe dogji e shkatërroi fshatra e qytete të tëra. Këto krime ishin sistematike, pasojat e të cilave rëndojnë edhe sot mbi mijëra familje.

I bindur se respektimi i shtetit të së drejtës përfshin edhe të drejtën dhe përgjegjësinë për të kundërshtuar, me mjete ligjore dhe institucionale, një aktgjykim që vlerësohet i padrejtë;

Liria dhe pavarësia e Kosovës janë të lidhura ngushtë me sakrificën e brezave, me rezistencën politike dhe paqësore të udhëhequr nga Presidenti Ibrahim Rugova, me luftën e Ushtrisë Çlirimtare të Kosovës (UÇK) dhe me mbështetjen vendimtare të aleatëve tanë perëndimorë, përfshirë NATO-n.

Miraton këtë deklaratë:

Kuvendi i Republikës së Kosovës, si institucioni përfaqësues i qytetarëve dhe shprehje e vullnetit të tyre demokratik, shpreh shqetësimin e tij të thellë ndaj aktgjykimit të shkallës së parë kundër Hashim Thaçit, Kadri Veselit, Rexhep Selimit dhe Jakup Krasniqit
.
Konsideron si të papranueshëm përfundimin për ekzistencën e një qëllimi kriminal të përbashkët.

KËRKON nga të gjitha institucionet shtetërore të Republikës së Kosovës që të ndërmarrin të gjitha veprimet e nevojshme për mbrojtjen e së vërtetës dhe të pastërtisë së luftës çlirimtare të popullit të Kosovës. Kuvendi bën thirrje për hartimin e një strategjie të përbashkët shtetërore, në kuadër të së cilës të bashkërendohen veprimet juridike, institucionale dhe diplomatike për mbrojtjen dhe afirmimin e së vërtetës së plotë historike mbi luftën e drejtë për liri dhe çlirim të Kosovës.

Në Kosovën e viteve 1998–1999, ekzistenca e një ndërmarrje të përbashkët kriminale për dëbimin e shqiptarëve nga Kosova është vërtetuar tashmë me aktgjykime të Tribunalit Ndërkombëtar për ish-Jugosllavinë, ndaj drejtuesve politikë, ushtarakë dhe policorë të Jugosllavisë dhe Serbisë. Ajo u zbatua përmes strukturave të një shteti që kishte nën kontroll ushtrinë, policinë dhe mjetet e tjera të pushtetit. Ky është konteksti historik dhe gjyqësor që duhet të mbetet i qartë sa herë flitet për luftën në Kosovë.

Kërkon nga Dhomat e Specializuara të respektojë mandatin në përputhje me vullnetin e Kuvendit të Republikës së Kosovës.

KUNDËRSHTON çdo përpjekje për të përmbysur të vërtetën historike të Kosovës, për të vënë në dyshim luftën e saj çlirimtare apo për të barazuar popullin që luftoi për liri dhe mbijetesë me regjimin që e shtypi atë.

E vërteta e luftës çlirimtare, drejtësia për viktimat dhe familjet e tyre dhe e drejta e të dënuarve për një gjykim të drejtë i përkasin së njëjtës Republikë. Kuvendi do t’i mbrojë të tria pa kompromis.

Burimi i lajmit: orainfo.net
Shënim: Ky material është përpunuar për qëllime informimi nga Portali lajme.mk.