Mbeturinat pushtojnë Kejin e Vardarit, qytetarët kërkojnë zgjidhje

Keji i Vardarit në Shkup po përballet me një problem gjithnjë e më të madh me mbeturinat. Në shtigjet dhe hapësirat përreth shëtitores janë krijuar deponi të vogla ilegale, ndërsa mbeturina të shpërndara ka pranë koshave, në gjelbërim dhe përgjatë rrugëve të frekuentuara nga qytetarët.

Banorët shprehen të revoltuar dhe ankohen edhe për erën e djegies së mbeturinave, e cila, sipas tyre, prej ditësh përhapet në zonën përreth.

Nga Komuna e Karposhit thonë se ekipet e tyre janë vazhdimisht në terren dhe ndërhyjnë në pikat kritike, ndërsa në bashkëpunim me Qytetin e Shkupit është zhvilluar edhe një aksion gjashtëjavor për pastrimin dhe parandalimin e deponive ilegale. Gjatë aksionit janë shqiptuar mbi 50 gjoba për persona që kanë hedhur mbeturina në mënyrë të parregullt.

Ndërkohë, qytetarët thonë se situata nuk është përmirësuar sa duhet dhe se deponitë ilegale po shfaqen gjithnjë e më shpesh edhe në zona urbane.

Si një nga masat për të parandaluar këtë dukuri, Qyteti i Shkupit ka propozuar vendosjen e 30 kamerave të mbikëqyrjes në lokacione të ndryshme. Kamerat synojnë të ndihmojnë në parandalimin e krijimit të deponive ilegale, por edhe në mbrojtjen e infrastrukturës publike dhe monitorimin e trafikut.

Mbetet të shihet nëse këto masa do të sjellin një ndryshim konkret dhe do ta rikthejnë pastërtinë në një nga hapësirat më të frekuentuara të Shkupit.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.