Mexhiti: Mbi 2 mijë shqiptarë pritet të kalojnë nga kontratat e përkohshme me vendime të përhershme pune, jo si BDI ti shantazhoj

Mbi 2 mijë punonjës shqiptarë në administratën publike në nivel qendror pritet të përfitojnë nga transformimi i kontratave të përkohshme në vendime të përhershme pune, në bazë të ligjit të ri. Këtë e bëri të ditur bashkëkryetari i VLEN-it, Izet Mexhiti, në emisionin “Verdikt” në TVM 2.

Mexhiti tha se përllogaritjet përfundimtare ende nuk janë përmbyllur, por sipas të dhënave paraprake, rreth 6 mijë punonjës të administratës në nivel qendror janë aktualisht të angazhuar me kontrata pune.

“Prej tyre, mbi 2 mijë punonjës, të cilët nga kontratat e përkohshme do të marrin vendime të përhershme, janë shqiptarë, mos edhe më shumë”, deklaroi Mexhiti.

Ai vlerësoi se transformimi i kontratave do të ndikojë pozitivisht në sigurinë e punës për këta punonjës.

“Vlerësojmë se kjo është e shëndetshme për sigurinë e tyre në punë”, u shpreh Mexhiti.

*Mexhiti: Nuk ka më që BDI t’i shantazhojë punonjësit me kontrata, ne po u japim vendime dhe siguri në punë*

Bashkëkryetari i VLEN-it, Izet Mexhiti, ka akuzuar BDI-në se i ka mbajtur punonjësit në kontrata të përkohshme për t’i shantazhuar politikisht, ndërsa ka mbrojtur Propozimligjin për transformimin e kontratave në vendime të përhershme pune.

Duke folur në emisionin “Verdikt” në TVM 2, Mexhiti tha se punonjësit me kontrata janë më të ekspozuar ndaj presionit politik, sidomos gjatë fushatave zgjedhore, kur sipas tij, ftohen në tubime dhe aktivitete në këmbim të sigurisë së vendit të punës.

“Është më mirë t’i kesh me vendime të përhershme pune sesa t’i mbash në kontrata dhe t’i keqpërdorësh politikisht, që në fushatë t’i ftosh nëpër tubime e aktivitete dhe për vota t’i shantazhosh”, deklaroi Mexhiti.

Ai theksoi se punësimi i përhershëm u siguron punonjësve më shumë autonomi, pagë dhe pozitë më të mirë, si dhe mundësi për llogaritjen e stazhit të punës.

Sipas Mexhitit, kjo i bën ata më pak të manipulueshëm nga politika ditore, ndërsa kritikat e opozitës ndaj kësaj nisme nuk qëndrojnë.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.