Mungojnë barnat, MSh-ja do të shpenzojë mbi 545 mijë euro për asgjësimin e barnave të skaduara

Në kohën kur pacientët përballen me mungesë të barnave, Ministria e Shëndetësisë po përgatitet të paguajë mbi gjysmë milioni euro për asgjësimin e barnave dhe materialit medicinal me afat të skaduar.

Ministria e Shëndetësisë ka dhënë dy kontrata për asgjësimin e barnave dhe materialit shpenzues medicinal me afat të skaduar, me një vlerë të kombinuar prej 545,550 eurosh.

Sipas dokumenteve të prokurimit, kontrata kryesore, në vlerë prej 514,350 eurosh, lidhet me asgjësimin e barnave të skaduara në Depon e Barnave të Ministrisë së Shëndetësisë. Kontrata i është dhënë kompanisë MetBat SH.P.K., ndërsa nënshkrimi i saj është planifikuar për 23 shtator 2026, shkruan ORAinfo.

Përveç kësaj, MSh-ja ka ndarë edhe 31,200 euro për 36 muaj për asgjësimin e barnave dhe materialit shpenzues medicinal me afat të skaduar në Njësitë Shëndetësore të Burgjeve. Edhe kjo kontratë i është dhënë së njëjtës kompani.

Mungojnë barnat, por paratë shkojnë për asgjësimin e tyre

Kontrata vjen në një moment kur furnizimi me barna mbetet një çështje e ndjeshme në sistemin shëndetësor. Në njërën anë, qytetarët kërkojnë barna dhe trajtim të sigurt, ndërsa në anën tjetër, dokumentet zyrtare tregojnë se në depot shtetërore ka barna dhe materiale medicinale që kanë arritur të skadojnë.

Dokumenti i prokurimit nuk tregon se cilat barna do të asgjësohen, megjithatë MSh-ja e përshkruan objektin e kontratës në mënyrë të përgjithshme si “asgjësimi i barnave dhe materialit shpenzues medicinal me afat të skaduar”.

Pikërisht këtu qëndron dilema kryesore: publiku paguan jo vetëm për barnat e blera, por edhe për largimin e tyre pasi ato bëhen të papërdorshme.

Mbi gjysmë milioni euro vetëm për asgjësim

MSh-ja kishte parashikuar një vlerë prej 549 mijë eurosh për kontratën, ndërsa për Lotin 1 kontrata është dhënë për 514,350 euro. Për Lotin 2, vlera është 31,200 euro për një periudhë trevjeçare.

Në total, bëhet fjalë për 545,550 euro të kontraktuara për shërbimin e asgjësimit.

Procedura është zhvilluar si tender i hapur, ndërsa kriteri i dhënies së kontratës ka qenë çmimi më i ulët. Për secilin lot kanë konkurruar nga dy operatorë ekonomikë.

MSh-ja do të vazhdojë të paguajë për asgjësimin

Një tjetër element që bie në sy është kohëzgjatja e marrëveshjeve. Për Lotin 1 është paraparë marrëveshje kornizë prej 36 muajsh, ndërsa edhe kontrata për Lotin 2 është për periudhë trevjeçare.

Kjo do të thotë se bëhet fjalë për një nevojë që MSh-ja e ka planifikuar për një periudhë disa-vjeçare, jo vetëm për një rast të izoluar. /ORAinfo/

Burimi i lajmit: orainfo.net
Shënim: Ky material është përpunuar për qëllime informimi nga Portali lajme.mk.