Ndryshimet në Ligjin për Prokurime Publike janë në rend dite të seancës së 129-të plenare të Kuvendit, pasi presidentja Gordana Siljanovska-Davkova refuzoi të nënshkruajë dekretin për shpalljen e tyre. Për këto ndryshime janë dorëzuar gjithsej 2.158 amendamente, të cilat deputetët duhet t’i shqyrtojnë sërish në fazën e leximit të tretë.
Shumica parlamentare ka paraqitur një amendament, me të cilin propozon fshirjen e nenit 13, që ishte edhe arsyeja e vetos presidenciale. Pjesa më e madhe e amendamenteve të tjera janë dorëzuar nga opozita, përkatësisht nga LSDM-ja.
Neni kontestues ka të bëjë me mandatet e kryetarit dhe anëtarëve të Komisionit Shtetëror për Ankesa për Prokurime Publike. Zgjidhja e deritanishme ligjore parashikonte mandat pesëvjeçar, me të drejtë edhe për një rizgjedhje, pra gjithsej deri në dhjetë vjet.
Me ndryshimet e propozuara, kjo formulë ishte zëvendësuar me mundësinë e riemërimit, pa përcaktuar qartë numrin e mandateve. Siljanovska-Davkova vlerësoi se formulimi i ri është juridikisht i pasaktë dhe lë hapësirë për rizgjedhje të pakufizuara. Sipas saj, një zgjidhje e tillë mund të çojë në përqendrim të pushtetit në vendimmarrjen për shpenzimin e mjeteve publike.
Më 4 nëntor, presidentja i dërgoi Kuvendit një shkresë me arsyetimin për refuzimin e nënshkrimit të dekretit, duke iu referuar nenit 75, paragrafit 3 të Kushtetutës.
Sipas Rregullores së Kuvendit, në rastet kur presidenti nuk e nënshkruan dekretin për shpalljen e një ligji, ai rikthehet për shqyrtim në fazën e leximit të tretë. Në këtë procedurë, amendamentet mund të paraqiten vetëm lidhur me vërejtjet e presidentit.
Ligji u miratua në Kuvend më 26 tetor, ndërsa tani rikthehet para deputetëve për rishqyrtim pas vetos presidenciale. Flaka
The post Ndryshimet në Ligjin për Prokurime Publike rikthehen në Kuvend, 2.158 amendamente në shqyrtim appeared first on Flaka, në çdo lajm... .
Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.
