Sektori për Punë të Brendshme në Ohër ka paralajmëruar qytetarët për shtimin e rasteve të mashtrimeve në internet, përfshirë edhe mesazhet e rreme për pagesën e kundërvajtjeve të trafikut të regjistruara nga sistemi “Qyteti i Sigurt”.
Sipas policisë, gjatë periudhës së fundit janë shtuar denoncimet nga qytetarët për mashtrime të ndryshme përmes internetit, telefonave celularë, aplikacioneve dhe rrjeteve sociale.
Qytetarët e dëmtuar kanë raportuar se marrin SMS dhe mesazhe elektronike nga numra të huaj telefoni, të shoqëruara me lidhje drejt faqeve të rreme të internetit.
Përmes këtyre mesazheve, mashtruesit përpiqen t’i joshin qytetarët me oferta për investime dhe tregti financiare, duke u premtuar fitime të mëdha dhe përfitime materiale. Në raste të tjera, ata kërkojnë nga qytetarët të vendosin të dhënat personale dhe bankare.
Një formë tjetër e mashtrimit lidhet me gjobat e trafikut. Qytetarëve u dërgohen mesazhe që pretendojnë se kanë kryer kundërvajtje të regjistruar nga sistemi “Qyteti i Sigurt”, ndërsa përmes një lidhjeje u kërkohet të paguajnë një shumë të caktuar parash.
SPB Ohër apelon për kujdes të shtuar gjatë pranimit të mesazheve të tilla. Qytetarët këshillohen të mos hapin lidhjet e dyshimta, të mos vendosin të dhëna personale apo bankare dhe të mos kryejnë pagesa. Çdo rast i tillë duhet të paraqitet në stacionin më të afërt policor.
Policia sqaron se njoftimet zyrtare SMS për kundërvajtjet e trafikut nga sistemi “Qyteti i Sigurt” dërgohen nga dërguesi “MVR SC”. Këto mesazhe përmbajnë të dhëna të plota dhe fotografi të automjetit me të cilin është kryer kundërvajtja, si dhe lidhjen drejt faqes zyrtare të internetit.
Autoritetet u bëjnë thirrje qytetarëve që të verifikojnë çdo njoftim para se të ndërmarrin ndonjë veprim, në mënyrë që të mos bien pre e mashtrimeve financiare.
The post Policia paralajmëron për mashtrime online: Qarkullojnë mesazhe të rreme për gjoba nga sistemi “Qyteti i Sigurt” appeared first on Flaka, në çdo lajm... .
Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.
