Revizioni zbulon parregullsi milionëshe në prokurimet publike të ESM-së

Enti Shtetëror i Revizionit ka konstatuar parregullsi dhe dobësi serioze në prokurimet publike të ESM-së për periudhën 2022–2024. Në 27 procedura të audituara, revizorët kanë evidentuar probleme në planifikim, realizimin e kontratave dhe konkurrencën mes ofertuesve.

Vetëm gjatë vitit 2024, ESM ka marrë përsipër detyrime në vlerë prej rreth 143,6 milionë euro, ndërsa në rreth 93 për qind të procedurave të audituara ka marrë pjesë vetëm një ofertues.

Raporti evidenton edhe raste të pajisjeve dhe materialeve të paguara me miliona euro që nuk janë përdorur. Për një motor me gaz janë paguar rreth 2,4 milionë euro, por pajisja nuk është vënë në funksion edhe pas më shumë se dy vitesh. Për aditivë janë paguar rreth 2,3 milionë euro, ndërsa një pjesë e madhe e tyre ka mbetur e papërdorur në REK Oslomej dhe i ka skaduar afati i përdorimit. Për zhvendosjen e pajisjeve janë paguar edhe rreth 1,7 milionë euro, ndonëse ato nuk janë vënë në përdorim.

Revizorët kanë konstatuar probleme edhe në kontratat e sigurimeve me vlerë rreth 5,8 milionë euro, të cilat më pas janë rritur me anekse për mbi 1,1 milionë euro, si dhe në një kontratë rreth 3 milionë euro për tuba për REK Manastir, ku furnizuesi kishte dorëzuar material sipas një standardi tjetër nga ai i kërkuar.

Nga ESM kanë deklaruar se një pjesë e parregullsive të konstatuara tashmë ishin evidentuar nga vetë kompania dhe se për disa prej tyre janë dorëzuar kallëzime penale te institucionet kompetente.

Enti Shtetëror i Revizionit ka rekomanduar forcimin e kontrolleve të brendshme, përmirësimin e planifikimit të prokurimeve dhe respektimin e plotë të procedurave ligjore.

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.