Sonte shpërthen Serie A! Amorim vs Abate – dueli që pritet të “ndezë” Milanin dhe Torinon

AC Milan e nis sonte sezonin 2026/27 në Serie A me transfertën ndaj Torinos, në një sfidë që shënon edhe fillimin e një epoke të re për të dyja skuadrat.

Në qendër të vëmendjes janë dy trajnerë të rinj, Ignazio Abate dhe Ruben Amorim, të cilët do të përballen për herë të parë në Serie A. Të dy janë në fundin e të tridhjetave dhe ndajnë një filozofi të ngjashme, të bazuar në futbollin ofensiv, presionin e lartë dhe kërkimin e vazhdueshëm për të luajtur përpara.

Abate, i lindur në nëntor të vitit 1986, vjen te Torino pas një ngritjeje të shpejtë në karrierën e tij. Ai bëri një punë të mirë te Ternana në Serie C, pavarësisht shkarkimit të diskutueshëm kur skuadra ndodhej në vendin e dytë. Më pas, te Juve Stabia në Serie B, ai e çoi ekipin deri në gjysmëfinalet e play-off-it.

Tani, Abate synon të bëjë hapin e madh me Torinon.

Në anën tjetër, Amorim, i lindur në janar të vitit 1985, e ndërtoi emrin e tij në Portugali me Braga dhe Sportingun, përpara aventurës së vështirë te Manchester United. Tashmë, në stolin e Milanit, trajneri portugez synon të rikthejë kuqezinjtë në majat e futbollit italian, përcjell ORAinfo.

Dy trajnerë, një filozofi

Abate dhe Amorim kanë shumë pika të përbashkëta edhe në aspektin taktik. Të dy preferojnë skemën 3-4-2-1 dhe i japin rëndësi të madhe presingut, mbajtjes së topit dhe lojës vertikale.

“E respektoj Amorimin sepse luan një futboll agresiv”, ka deklaruar Abate në prag të ndeshjes.

Amorim, nga ana tjetër, ka treguar se e njeh mirë kundërshtarin: “E di se me kë po përballemi dhe çfarë futbolli luan Abate. Do të jetë një ndeshje e madhe.”

Për këtë arsye, pritet një duel i hapur dhe ofensiv, larg idesë së një loje ku të dyja skuadrat fokusohen vetëm te mbrojtja.

Abate me një motiv shtesë ndaj Milanit

Përballja ka edhe një dimension emocional për Abaten. Ish-mbrojtësi ka kaluar dhjetë sezone si futbollist i Milanit dhe më pas drejtoi ekipin Primavera, me të cilin arriti deri në finalen e UEFA Youth League në vitin 2024.

Megjithatë, marrëdhënia e tij me klubin u mbyll pas një përplasjeje me Zlatan Ibrahimović. Abate ishte planifikuar të merrte drejtimin e Milan Futuro në Serie C, por në fund përfundoi te Ternana.

Vendimi rezultoi pozitiv për karrierën e tij, pasi që atëherë Abate ka bërë një ngjitje të shpejtë dhe tani është në stolin e Torinos.

Për Amorimin situata është ndryshe. Trajneri portugez është thirrur për të thyer atë që në Itali është cilësuar si “mallkimi portugez” i Milanit, pas eksperiencave të Paulo Fonseca dhe Sérgio Conceição, të cilët nuk arritën të lënë pas një periudhë të suksesshme në San Siro.

Ndeshja e sotme nuk do të vendosë asgjë për sezonin, por do të japë sinjalet e para se në çfarë drejtimi do të shkojnë Milani i Amorimit dhe Torino e Abates. Dy trajnerë të rinj, dy skuadra me ambicie dhe një duel që premton ritëm dhe futboll ofensiv. /ORAinfo/

Burimi i lajmit: orainfo.net
Shënim: Ky material është përpunuar për qëllime informimi nga Portali lajme.mk.