Të mërkurën, aksion masiv për pastrimin e Shkupit në mbi 50 lokacione

Kryetari i Qytetit të Shkupit, Orce Gjorgjievski, ka njoftuar se të mërkurën, në orën 11:00, do të vazhdojë aksioni masiv për pastrimin e kryeqytetit.

Sipas Gjorgjievskit, në aksion pritet të marrin pjesë mijëra vullnetarë në të gjitha komunat e Shkupit. Pastrimi do të zhvillohet në më shumë se 50 lokacione, përfshirë parqe, rrugë, shtigje për këmbësorë, hapësira publike dhe zonat ndërmjet ndërtesave.

Në aksion do të përfshihen komunat, kryetarët e tyre, nxënësit dhe qytetarët që dëshirojnë të kontribuojnë për një mjedis më të pastër dhe më të shëndetshëm.

Gjorgjievski ka bërë thirrje që qytetarët t’i bashkohen iniciativës, duke theksuar se aksionet e pastrimit do të organizohen dy herë në muaj, me synimin që kujdesi për pastërtinë të vazhdojë edhe ndërmjet tyre.

Për lokacionet e sakta dhe mënyrën e pjesëmarrjes, qytetarët mund të informohen pranë komunave të tyre.

Burimi i lajmit: lajmpress.org
Shënim: Ky material është përpunuar për qëllime informimi nga Portali lajme.mk.