Të paktën 80 të vdekur nga tërmeti i fuqishëm në Kolumbi

Të paktën 80 persona kanë vdekur pas tërmetit të fuqishëm me magnitudë 7.4 ballë që goditi Kolumbinë më herët sot, sipas një vlerësimi të CNN bazuar në raportet paraprake nga guvernatorët dhe kryetarët e bashkive në zonat e prekura.

Tërmeti ka shkaktuar dëme të mëdha në pjesë të ndryshme të vendit, ndërsa ekipet e emergjencës po vazhdojnë kërkimet dhe operacionet e shpëtimit në zonat më të prekura.

Departamenti i Risaraldës raportohet të jetë një nga zonat më të goditura. Guvernatori i Risaraldës, Juan Diego Patino, ka bërë të ditur se në këtë rajon janë konfirmuar të paktën 40 viktima, raportoi CNN.

Lëkundjet e fuqishme janë ndier në një pjesë të madhe të Kolumbisë, ndërsa janë raportuar ndërtesa të dëmtuara dhe të shembura në disa qytete, përfshirë Pereira, Cali dhe Manizales.

Ekipet e emergjencës janë angazhuar në terren për kërkimin e personave që mund të kenë mbetur nën rrënoja, ndërsa autoritetet po vlerësojnë përmasat e dëmeve.

Autoritetet kanë paralajmëruar se bilanci i viktimave mund të ndryshojë, pasi operacionet e kërkim-shpëtimit janë ende në zhvillim dhe raportimet nga zonat e prekura po verifikohen.

Tërmeti, me magnitudë 7.4, është regjistruar në pjesën perëndimore të Kolumbisë dhe lëkundjet janë ndier edhe përtej kufijve të vendit.