Tri vetura digjen brenda disa orëve në Çair dhe Gazi Babë

Një seri incidentesh me zjarre ka alarmuar kryeqytetin gjatë orëve të para të mëngjesit të së dielës, ku tri automjete janë përfshirë nga flakët brenda një harku kohor prej vetëm tri orësh në dy lokacione të ndryshme të Shkupit.

Sipas njoftimit zyrtar nga Sektori i Punëve të Brendshme (SPB) Shkup, ngjarja e parë është denoncuar rreth orës 03:05, në rrugën “John Kennedy” në Çair. Një automjet i llojit “Mercedes” me targa të Shkupit, në pronësi të 54-vjeçarit me iniciale Z.I., është kapluar tërësisht nga zjarri, përcjell INA.

Pa kaluar mirë tri orë nga incidenti i parë, në orën 06:05, një tjetër zjarr është raportuar në rrugën “Finska” në lagjen Gazi Babë. Në këtë rast, flakët kanë shpërthyer mbi një automjet “Chevrolet Captiva” me targa të Kumanovës, në pronësi të D.N. (40) nga Kumanova, ndërsa zjarri është përhapur me shpejtësi duke dëmtuar edhe një veturë “Volkswagen Golf 4” me targa të Shkupit që ndodhej e parkuar ngjitur.

Nga të dyja incidentet nuk ka të lënduar në njerëz, ndërsa ndërhyrja e menjëhershme e Brigadës së Mbrojtjes Kundër Zjarrit të Shkupit ka bërë të mundur lokalizimin dhe fikjen e flakëve.

Ministria e Punëve të Brendshme ka bërë të ditur se ekspertët e kriminologjisë kanë kryer këqyrjen e vendeve të ngjarjes dhe po ndërmarrin të gjitha masat e nevojshme hetimore për zbardhjen e plotë të shkaqeve të zjarrit dhe për të konfirmuar nëse bëhet fjalë për djegie të qëllimshme.(INA)

Burimi i lajmit: ina-online.net
Shënim: Ky material është përpunuar për qëllime informimi nga Portali lajme.mk.