Trump kërkon kompensim nga Irani për viktimat dhe të plagosurit: Të paguajë për të gjithë njerëzit që ka vrarë

Presidenti i Shteteve të Bashkuara, Donald Trump, ka deklaruar se do të kërkojë që Irani të paguajë kompensim për personat që, sipas tij, janë vrarë ose plagosur rëndë nga Teherani.

Sipas Reuters, deklarata e Trump vjen si përgjigje ndaj kërkesës së Iranit për kompensim për dëmet e shkaktuara nga sulmet e SHBA-së dhe Izraelit.

Në një postim në rrjetin e tij social Truth Social, Trump tha se tashmë edhe ai po kërkon kompensim nga Irani.

“Është një ide interesante sepse tani po kërkoj gjithashtu kompensim nga Irani, për të gjithë njerëzit që kanë vrarë dhe plagosur rëndë me bombat e tyre buzë rrugës dhe në shumë konflikte”, shkroi Trump.

Deklarata e presidentit amerikan erdhi pasi Irani tha gjatë fundjavës se ishte pranë një marrëveshjeje me Omanin për krijimin e korridoreve të reja të transportit detar përmes Ngushticës së Hormuzit.

Megjithatë, Teherani ka përsëritur se për rihapjen e kësaj rruge strategjike duhet të plotësohen disa kushte, mes tyre kompensimi për dëmet e shkaktuara, heqja e sanksioneve dhe përfundimi i kërcënimeve ushtarake amerikane.

Trump përmendi gjithashtu sulmin ndaj anijes luftarake amerikane USS Cole, e cila u godit nga një sulm vetëvrasës në një port të Jemenit në tetor të vitit 2000. Sulmi vrau 17 marinarë amerikanë dhe plagosi më shumë se 30 të tjerë.

Sipas FBI-së, sulmi ndaj USS Cole iu atribuua Al-Kaedës.

Trump kërkoi gjithashtu që Irani të paguajë kompensim për familjet e personave që, sipas tij, janë vrarë gjatë protestave antiqeveritare në Iran.

Presidenti amerikan deklaroi se qeveria iraniane duhet të kompensojë familjet e mijëra personave të vrarë gjatë protestave. Ndërkohë, grupet e të drejtave të njeriut kanë raportuar se autoritetet iraniane kanë vazhduar goditjen ndaj kundërshtarëve edhe gjatë konfliktit.