VLEN: “Për më shumë se 20 vjet shqiptarëve u është treguar vetëm njëra anë e Marrëveshjes së Ohrit”

VLEN ka reaguar ashpër ndaj kryetarit të BDI-së, Ali Ahmeti, duke hapur debat për mënyrën se si është interpretuar dhe zbatuar Marrëveshja e Ohrit gjatë më shumë se dy dekadave.

“Ka disa të vërteta që janë të dhimbshme, por duhet të thuhen. Për më shumë se 20 vjet, shqiptarëve u është treguar vetëm njëra anë e Marrëveshjes së Ohrit”, thuhet në reagimin e VLEN-it.

Në qendër të deklaratës është Gëzim Ostreni, një nga figurat e përfshira në zhvillimet e vitit 2001. Sipas VLEN-it, Ostreni ka deklaruar publikisht se, në kohën kur Ali Ahmeti drejtonte procesin politik, gjuha shqipe nuk u përfshi me emër në Kushtetutë, ndërsa formulimi për përdorimin e saj u lidh me pragun prej 20 për qind.

“Gëzim Ostreni, një nga aktorët kryesorë të vitit 2001, para gjithë opinionit tha se, derisa Ali Ahmeti drejtonte lojën politike, gjuha shqipe mbeti jashtë Kushtetutës dhe shqiptarët mbetën me formulimin e turpshëm të 20 për qindëshit”, deklaron VLEN.

Sipas koalicionit, Ostreni ka thënë gjithashtu se fillimisht kishte menduar se në Kushtetutë bëhej fjalë për gjuhën shqipe, por vetëm vite më vonë kishte kuptuar se formulimi kushtetues i referohej gjuhës së një komuniteti që përbën mbi 20 për qind të popullsisë.

VLEN pretendon se në procesin politik të vitit 2001 kishte ekzistuar edhe kërkesa që Maqedonia të bëhej “shtet shqiptaro-maqedonas”, por se në fund, sipas tyre, gjuha shqipe nuk u emërtua drejtpërdrejt në Kushtetutë.

“Ne, si brez i ri politik, nuk kemi detyrim t’i ruajmë mitet e askujt. Kemi detyrim t’ua themi shqiptarëve të vërtetën dhe të kërkojmë përgjegjësi për vendimet e marra në emër të tyre”, thekson VLEN.

Nga koalicioni kërkojnë përgjigje nga Ali Ahmeti për atë që e konsiderojnë si kompromis të rëndësishëm politik.

“Çfarë e shtyu që, nga kërkesa për një shtet shqiptaro-maqedonas, të përfundonte duke pranuar që gjuha shqipe të mos përmendej me emrin e saj?”, pyet VLEN.

Në deklaratë, koalicioni akuzon gjithashtu BDI-në dhe Ahmetin se gjatë viteve e kanë përdorur Marrëveshjen e Ohrit si mburojë politike ndaj kritikave për qeverisjen.

“Sa herë që BDI-ja kapej ngushtë për korrupsion, dështime apo pazare në kurriz të shqiptarëve, Ali Ahmeti dilte para shqiptarëve duke përdorur Marrëveshjen e Ohrit. E përdori si mburojë për gjithçka që bëri dhe për shumëçka që nuk e bëri”, thuhet në reagim.

VLEN thekson se Marrëveshja e Ohrit nuk është pronë e një partie apo lideri politik.

“Por Marrëveshja e Ohrit nuk është tapi e BDI-së dhe as pronë e Ali Ahmetit. Ajo është rezultat i sakrificës së një populli të tërë”, deklaron koalicioni.

Në fund, VLEN ngre edhe një pyetje tjetër:

“Nëse për gjuhën shqipe ke bërë kompromise, çfarë tjetër nuk u ke treguar shqiptarëve?”

Koalicioni pretendon se ndryshe nga BDI-ja, synon që Marrëveshjen e Ohrit ta përdorë si bazë për reforma të reja institucionale.

“Për herë të parë pas 25 vjetësh, përfaqësimin e drejtë dhe adekuat po e shndërrojmë nga parimi kushtetues në ligj, ndërsa decentralizimin po e rikthejmë aty ku e ka vendin, në mesin e prioriteteve kryesore”, thuhet në deklaratë.

VLEN i cilëson përfaqësimin e drejtë dhe adekuat dhe decentralizimin si dy shtylla të Marrëveshjes së Ohrit që, sipas tyre, kanë mbetur të parealizuara plotësisht për më shumë se dy dekada.

“Sado e dhimbshme të jetë e vërteta, ajo duhet të thuhet. Sidomos kur në emër të shqiptarëve është folur shumë, ndërsa në kurriz të tyre janë bërë edhe më shumë abuzime”, përfundon reagimi i VLEN-it.

The post VLEN: “Për më shumë se 20 vjet shqiptarëve u është treguar vetëm njëra anë e Marrëveshjes së Ohrit” appeared first on Flaka, në çdo lajm... .

Burimi i lajmit: flaka.com.mk
Shënim: Ky material është përpunuar për qëllime informimi nga Portali lajme.mk.